Naglunsar sang mga taktikal nga opensiba ang mga yunit sang Bagong Hukbong Bayan (BHB) sang nagligad nga mga semana batuk sa mga pwersang militar kag mapangwasak nga konstruksyon sa Rizal, Mindoro kag Negros.

Sa Rizal, ginbira sang BHB-Rizal (Narciso Antazo Aramil Command) ang tropa sang 80th IB sadtong Pebrero 17 sa Sityo Tayabasan, Barangay San Jose, Antipolo City, mga alas-3 sang hapon. Isa ka soldado ang napatay.

Madugay na nga yara sa lugar ang mga tropa sang AFP nga nagaserbe nga protektor sang mapangwasak nga Wawa-Violago Dam kag pagkwari nga nagpalayas sa mga mangunguma kag nagtuga sang grabe nga kahalitan sa kapalibutan sang Rizal.

Sa Negros Oriental, ginpatigayon sang mga Pulang hangaway ang pagsilot batuk sa nagapangkawkaw kag mapangwasak nga operasyon sang kumpanya nga ginapanag-iyahan sang dalagko nga kumprador nga pamilyang Limkaichong sadtong Pebrero 8 sa Barangay Aya, La Libertad. Ginparalisa sang yunit ang isa ka dump truck, isa ka pison, kag duha ka backhoe nga ginagamit sa pagtukod sang karsada para sa mina kag plantasyon. Ginatantya nga ₱20 milyon ang pangkabug-osan nga danyos sang operasyon.

Samtang, napaslawan ang nagsalakay nga yunit sang 4th IB nga ubuson ang ginsalakay sini nga yunit sang BHB sa Sityo Balugo, Barangay Budburan, Mansalay, Oriental Mindoro sadtong Pebrero 15. Maisog nga nagpakig-away ang mga Pulang hangaway gani nahimo nila nga halitan ang mga berdugo. Duha ang patay, lakip ang kumander sang platun, kag siyam ang pilason sa nag-atake nga kaaway.

Antes sini, indi magnubo sa apat ka soldado sang 203rd IBde ang kaswalti sa duha ka aktibo nga depensa sang mga yunit sang BHB-Mindoro (Lucio de Guzman Command) sa mga pagpangsalakay nga ginpatigayon sang militar sa San Jose, Occidental Mindoro kag Mansalay, Oriental Mindoro sadtong Pebrero 11.