Ginbuyagyag sang Department of Labor and Employment (DOLE) ang pagka maka-kapitalista sang magpaguwa ini sang mando nga “assumption of jurisdiction” ukon AJ sadtong Pebrero 5 sa gina-atubang nga away sang mamumugon kag unyon sa Nexperia Philippines Inc. Paagi sa AJ, epektibo nga gindumilian sang DOLE ang plano nga welga nga ginhanda sang mga mamumugon sa pagpanguna sang Nexperia Philippines Inc Workers’Union-National Federation of Labor Unions-Kilusang Mayo Uno (NPIWU-NAFLU-KMU).

Ang AJ isa ka kamanduan nga ginpaguwa sang tiglikom sang DOLE sa mga kagamo sa pamugon sa mga industriya nga ginakabig “importante sa pungsodnon nga interes”. Otomatiko nga punggan sini ang ano man nga welga ukon lockout, kag obligado gilayon nga magbalik sa trabaho ang mga mamumugon kag padayunon ang operasyon sang kumpaniya. Gamit ang AJ, pwede nga pahulagon sang DOLE ang mga pulis kag militar agud ipiton ang mga mamumugon nga magapamatuk sini nga kamanduan.

Asud-asod nga mga piket kag rali ang ginpatigayon sang NPIWU sining Pebrero agud batikuson ang AJ. Singgit nila nga gilayon nga ibasura ang AJ kag sabton sang Nexperia ang madugay na nga demanda sang mga mamumugon diri. Madumduman nga nagboto ang mayoriya sang mga katapo sang NPIWU-NAFLU-KMU sadtong Disyembre 20, 2024 agud ikasa ang welga pagkatapos sang isa ka tuig nga pag-atrasar sang kumpaniya sa negosasyon kag deadlock sa negosasyon para sa bag-o nga collective bargaining agreement (CBA). Pagpakigbato man ini sa iligal nga kakasanay kag pagkakas sa trabaho sang apat ka upisyal sang unyon lakip ang pangulo sini sadtong Disyembre 17, 2024.

Suno sa Center for Trade Union and Human Rights (Philippines), lapas ang AJ sa kinamatarung sang mga mamumugon sa pakig-negosasyon sa CBA kag kinamatarung nga magwelga. May yara na sang pamatbat ang International Labour Organization Committee of Experts on the Application of Conventions (ILO CEACR) nga nagalapas sa ILO Conventions 87 kag 98 ang AJ sa kinamatarung sa kolektibo nga pakig-negosasyon kag kinamatarung nga magwelga.

Ang Nexperia kabahin sang isa ka kumpaniya nga multinasyunal nga nagatuga sang mga semiconductor chip nga ginagamit sa mga salakyan, cellphone, kag iban pa. Lakip sa mga kliyente sini ang Bosch, Continental, Denxo, Huawei, Neltz, Tesla, Xiaomi kag Samsung.

Sa subong, makahimo ang Nexperia Philippines sang pito ka milyon ka chip kada adlaw. Kabahin man ini sa masobra 90 ka bilyon nga semiconductor chip nga ma-prodyus sang bug-os nga kumpaniya kada tuig. Sining Pebrero, nag-report ang kumpaniya sang kabilugan nga kita nga $12.61 bilyon para sa 2024.

Ang Nexperia amo ang anay Phillips Semiconductors, isa sa pinakadako nga kumpaniya sang semiconductor nga nakabase sa The Netherlands. Ginbaligya ini sang mga Dutch sa nagapanag-iya sang mga nagapangapital nga Amerikano sadtong 2016 kag nangin NXP Semiconductors. Sadtong 2017, nabakal ini sang Wing Tech, isa ka kumpaniya nga Chinese nga kabahin sang pagpanag-iya sang estado sang China. May yara ini mayor nga mga opisina sa The Netherlands kag China.