Mabaskog nga ginkundenar sang People Surge, alyansa sang mga nakaluwas sa kalamidad, ang pagka-inutil sang rehimen Marcos nga hatagan-proteksyon ang mga bulnerable nga komunidad sa panahon sang mga bagyo kag pag-ulan nga dala sang shear line. Ginbatikos man sini ang pagpabor sang rehimen sa mapangwasak nga mga proyekto kag operasyon sang mina, kwari kag pagbag-o gamit sang duta nga nagpalala sa mga kahalitan sang pagbaha kag pag-ulan. Gingiit sini nga dapat hatagan-hustisya kag kumpensasyon ang mga nakaluwas sa mga kalamidad kag untaton ang nasambit nga mga mapangwasak nga operasyon.

Halin Enero, bug-os nga barangay sa Samar, Davao, mga rehiyon sang Camarines, Cagayan kag iban pa nga mga probinsya ang nalumos sa baha tungod sa malawig kag mabaskog nga pag-ulan nga dala sang shear line. Ang shear line amo ang banggaan sang lain-lain nga kadasig, direksyon kag temperatura sang hangin nga nagaresulta sa pag-ulan.

Sang sini lang, ginlumos sang mga ulan ang mga barangay sa mga rehiyon sang Calabarzon, Western Visayas kag Central Visayas nga nagtuga sang kahalitan sa 850,000 indibidwal. Lakip sa mga nabalita ang grabe nga pagbaha sa Puerto Princesa City kag iban pa nga banwa sa Palawan, kon diin lima ang napatay.

Tuman ka kulang ang ginpanagtag sang estado nga ₱65 milyon nga ayuda kon ianggid sa kadakuon sang kahalitan, suno sa grupo. Indi sini masarangan nga liwat ipatindog ang mga balay, ibalik ang mga nadula nga pananum, ukon sabton ang troma nga gintuga sa aton mga komunidad sa tuman ka gamay nga balor nga ini.

Panawagan sang alyansa nga dapat may kumprehensibo nga plano pang-kalamidad agud hatagan prayoridad ang pinaka-bulnerable nga mga lugar kag mga programa para sa palangabuhian sa mga apektado nga mga komunidad. Kinahanglan man nga pasabton ang mga lokal kag pungsodnon nga mga upisyal nga napaslawan nga protektaran ang ila pumuluyo, tungod ang ila pagpabaya nagpabaskog sa kagrabehon sang kalamidad.