Ginkuha kag hungod nga ginpatay sang mga soldado sang 62nd IB ang mangunguma nga si Rolito Tanillo sa Barangay Tala-on, La Libertad, Negros Oriental sadtong Pebrero 10, alas-7 sang gab-i. Suno sa report, ginkuha siya sang mga soldado halin sa iya balay, gindala sa iban nga lugar agud patyon.

Ginpaguwa sang mga soldado nga napatay siya sa engkwentro sa Bagong Hukbong Bayan (BHB). Patarasak sila nga nagpalupok para sa peke nga engkwentro. Nagtuga ini sang grabe nga kahadlok sa taga-baryo.

Pila ka adlaw antes ang pagpatay, iligal nga nang-aresto ang 62nd IB sa mga sibilyan sadtong Enero 29 kag 31 sa Central Negros.

Sa Barangay Linantuyan, Guihulngan City, Negros Oriental, gin-aresto ang 70-anyos nga si Naring Remasog sa indi maathag nga basehan. Tubtob subong indi pat-ud sang pamilya kon diin gindala sang mga soldado ang biktima kag kon ano ang iya kahimtangan.

Sa Barangay Santol, Binalbagan, Negros Occidental, gin-aresto si Bobet Carillo sadtong Enero 29. Ginpakutkot sang duta sa idalum sang ila balay ang iya asawa kag bata agud kuno pangitaon ang armas nga gintago diri ni Carillo. Wala labot pa diri, pilit nga ginpagiya sa operasyon kombat si Carillo sa magkatambi nga mga banwa malapit sa Binalbagan. Sadtong Pebrero 18, gin-report sang mga residente sa Hacienda Tres Hermanos sa Barangay Luna, Cadiz City ang pagdagsa sang mga Scout Ranger halin sa 79th IB sa ila komunidad. Ginsulod nila ang balay sang tsirman sang asosasyon kag ginpaidalum siya sa interogasyon.

Pagpang-ipit. Sa Cordillera, ginpasakaan sang reklamo nga paglapas sa “terrorism financing” ang tagpamaba sang Kilusang Mayo Uno-Cordillera nga si Mike Cabangon. Sadtong Pebrero 15, nakabaton si Cabangon sang reklamo nga ginpasaka sang pulis batuk sa iya bangud kuno sa duha ka insidente sang paglapas sa “terrorism financing.”

Si Cabangon ang ika-12 nga progresibong indibidwal sa Northen Luzon nga ginpasakaan sang himo-himo nga reklamo kaangot sa terrorism financing.

Sa Iloilo, gin-report sang Anakbayan-West Visayas State University (WVSU) ang pagkumpronta sini sa isa ka katapo sang Student Intelligence Network (SIN) sa idalum sang Reserve Officer Training Corps (ROTC) nga nagpakuno-kuno nga estudyante sang unibersidad kag nagpanilag sa ila organisasyon. Nag-ako ang amo nga indibidwal sa iya ginhimo nga pagpanilag batuk sa mga katapo sang Anakbayan-WVSU santo sa mando sa iya sang ROTC.