Isa ka bulan pa lang halin sang magpungko si Donald Trump bilang presidente sang United States of America, apang wala-tuo na ang iya pagpanaruso kag pagpang-atake, kaangay sang isa ka demonyo nga daw buang agud angkunon ang tanan para sa iya kaharian. Sa iya mga deklarasyon kag mga tikang, ginkakas ni Trump ang maskara sang US bilang “tigpalapnag sang demokrasya,” kag ginbuyagyag ang matuod nga nawong kag duag sang US bilang wala sang kabulusgan nga imperyalistang gahum nga nalubong sa krisis kag desperado nga salbaron ang nagakadula nga emperyo.

Sa sulod sang US, ginalaragway ang nagadalum nga krisis sa pulitika kag pagbaskog sang tendensya nga pasista, rasista kag ultra-konserbatibo, lapnagon nga ginatapakan sang gobyernong Trump ang demokratiko nga kinamatarung sang pumuluyong Amerikano. Sa mando ni Trump, pila ka puluan ka libo nga empleyado sang gobyerno ang wala sang notisya nga ginpangkakas sa trabaho, sa tabon sang “pagkinot.” Ginpahulag niya ang mga armadong ahensya sang estado agud mapintas nga prisohon ukon palayason ang minilyon nga mga “iligal” nga migarante sa US.

Sa halos tanan nga bahin sang kalibutan, nagaatubang ang pumuluyo kag mga pungsod sa mga pagpang-ipit sa ekonomiya kag mga peligro sang agresyon sang imperyalismong US. Ginagamit ni Trump ang pagpatuman sang taripa sa baligyaanay, pagbawi ukon pag-ipit sang mga ayuda militar kag pang-ekonomiya, batuk sa mga pungsod nga luyag niya ipiton, pasundon ukon paluhuron sa iya mga dikta.

Nagpatuman si Trump sang dugang nga mga taripa batuk sa mga produkto sang Canada, Mexico kag China sa pagtinguha nga ipiton ang mga ini agud ihatag ang iya gusto. Kadungan sini, nagdeklarar si Trump sang kagustuhan niya nga ipaidalum ang Canada bilang ika-51 nga estado sang US. Gin-anunsyo man niya ang plano nga kuhaon ang kontrol sa Panama Canal halin sa Panama tungod kuno ginapaburan sini ang China. Nagatuga man si Trump sang gahod sa plano nga “baklon” ukon sakupon ang Greenland.

Gindeklarar man ni Trump ang iya plano nga “kuhaon ang kontrol” kag “panag-iyahan” ang Gaza Strip, kag palayason ang tanan nga Palestino halin sa ila duta kag puluy-an. Ini sa lubos nga paglapas sa kahilwayan kag kinamatarung sang mga Palestino sa kaugalingon nga pagbuot. Ginasulsolan ni Trump ang Zionistang estado sang Israel nga liwat padayunon ang pagpangbomba sa Gaza, bayolasyon sa kasugtanan nga untat-lupok.

Sang sini lang, ginmando ni Trump ang 90-adlaw nga suspensyon sang $64-bilyon nga mga programa nga ginapondohan sang USAID ukon US Agency for International Development. Ginagamit ni Trump ang ini nga suspensyon agud labi pa nga paludhon ang mga atrasado nga mga pungsod nga dako ang pagsalig sa mga programa sang USAID. Lakip sa gina-ipit ni Trump amo ang mga programa pang-ikaayong-lawas sa South Africa, nga luyag niya nga paatrason sa pagkundena sa Israel sa gyerang henosidyo batuk sa mga Palestino, kag agud punggan ini nga magpatuman sang reporma sa duta nga makadula sa kaayusan sa duta sang anay rehimen rasista.

Sa duso ni Trump, ginsugdan sang US kag Russia ang negosasyon agud kuno tapuson ang gyera sa Ukraine. Mas nga nagaklaro subong nga ang gyera nga ini isa ka “proxy war.” Ginabasol subong ni Trump ang Ukraine nga “ginsugdan ang gyera”, bisan pa nga ang matuod, maguday na nga ginagamit sang US ang Ukraine para sa pagsampok sa Russia. Sa pagpakig-abyan ni Trump sa Russia sa hambalanon sa Ukraine, ang lagas niya ang bentaha sang pagkontrol sa mga manggad mineral sang rehiyon, subongman, ang magtuga sang biak sa tunga sang Russia kag China, para sa estratehikong katuyuan sang US nga iligwin ang China.

Sa idalum ni Trump, padayon ang mga pwersang militar sang US sa pagpabaskog sang dalagko nga presensya sini sa Asia, partikular na sa palibot sang China, kag pagkasangkapan sa armadong pwersa sang Pilipinas kag ido-ido nga gobyernong Marcos, agud tayuyon nga garit-gariton ang China.

Sa kahangawa nga puntiryahon ni Trump ang gobyerno sang Pilipinas sang pareho sang pagpang-ipit sa iban nga pungsod, nagakarakasa subong ang rehimen Marcos nga magpahambog sa bag-o niya nga amo agud pamatud-an ang iya katampad sa imperyalismong US. Labi pa nga ginapahugot ni Marcos ang pagkahigot sang patakaran pangluwas kag kaayuhan sang Pilipinas sa interes kag heyo-pulitikal nga adyenda sang iya imperyalistang amo nga US nga palibutan kag punggan ang mas nga pagbaskog sang imperyalistang China.

Sining nakaligad nga mga senemana, ginpasingki sang gobyernong Marcos ang pagpaypay sang kalayo nga kontra-China, paagi sa pagdakup sa kuno mga “espiya” sang China sa Pilipinas (bisan pa hilway nga naga-operasyon sa Pilipinas ang mga ahente sang CIA, pareho sang magbulusok ang eroplano pang-espiya sini sa Maguindanao). Wala untat man ang mga pabula nga “pagtabog” sa “higante” nga barkong Coast Guard sang China sa West Philippine Sea (bisan pa nga naghipos lang ini sang mag-agi ang higante nga USS Carl Vinson sa mismo kadagatan teritoryal sang Pilipinas, sang magsulod ini sa tunga sang Leyte kag Mindanao, antes nag-istasyon sa Palawan).

Ginpakita sang mga tikang sang gobyernong Trump ang desperasyon sang imperyalismong US nga igiit ang kaugalingon bilang nagapanguna nga gahum sa kalibutan, sa pihak sang estratehiko nga paghuyang sini. Ginatiglawasan niya ang interes sang mga monopolyo kapitalista nga mga Amerikano nga nagahandum nga palaparon ang sakup sang impluwensiya kag kontrol sang US sa mga ginakuhaan sang dunang manggad, mga rota sang baligyaanay kag patag sang pangapital sa lain-lain nga bahin sang kalibutan.

Ang mga mapintas, bayolente kag mapangwasak nga mga tikang ni Trump nagaduso sang malaparan nga pagpakigbato sa iya paghari. Subong pa lang, madasig nga nagasingki ang kaakig sang mga mamumugon kag pumuluyong Amerikano. Bisan ang mga korte kag ahensya sang gobyerno nagapamatok sa tiraniya ni Trump. Ang nagadamo nga mga rali sa lain-lain nga bahin sang US palatandaan sang nagahorma nga dako nga bulwak sang protesta nga pat-ud nga magalamon sa rehimen Trump, sa indi magdugay.

Dapat madasig man nga maghulag ang pumuluyong Pilipino agud pakigbatuan ang pagka sunod-sunoran sang ido-ido nga rehimen Marcos, pamatukan ang pagpasilabot sang US, kag pakigbatuan ang pag-ganoy sa Pilipinas sa mga kagamo nga ginatuga sang US para sa kaugalingon sini nga interes, ilabi na sa kontra nga karibal sini nga China. Padabdabon ang espirito sang patriyotismo sang pumuluyong Pilipino agud isulong ang inaway banwa agud ipakig-away ang matuod nga kahilwayan sang pungsod, kag tapuson ang kontrol kag dominasyon sang imperyalismong US nga amo ang pinakadako nga ugat sang kaimolon kag pag-antus sang pumuluyong Pilipino.