Duha ka kaso sang peke nga engkwentro ang nalista sa Mindoro kag Negros sa sulod lang sang isa ka semana kon diin tatlo ang ginpatay sang mga soldado sang Armed Forces of the Philippines (AFP). Lubos nga paglapas sa internasyunal nga makatawo nga layi kag pagsulundan sang gyera ang hungod nga pagpatay sang AFP sa mga biktima.

Sa Negros Occidental, gin-abdak sang mga ahente sang Crime Investigation and Detection Group sanday Nonoy Ponteras (Ka Jojo) kag Marisa Pobresa (Ka Kim) sadtong Marso 7, alas-8 sang gab-i, sa isa ka barangay sa Bacolod City. Pagka-aga, ginpaguwa sila nga napatay sa isa ka armado nga engkwentro sang AFP kag Bagong Hukbong Bayan (BHB) sa Sityo Paraiso, Barangay Caduhaan, Cadiz City. Suno sa BHB-Negros Island (Apolinario Gatmaitan Command), ang duha ginpaidalum sa tortyur antes hungod nga ginpatay.

Sa Oriental Mindoro, ginpanginwala sang BHB-Mindoro (Lucio de Guzman Command) nga Pulang hangaway ang ginasiling sang 4th IB nga napatay sini sa isa ka “engkwentro” sadtong Marso 14 sa Sitio Cabuyao, Barangay Panaytayan, Mansalay. Suno sa hukbo sang banwa, wala sang yunit ukon elemento sang BHB sa amo nga barangay sa panahon nga ini. Indi pa matumod ang ngalan sang biktima.

Sa pareho nga insidente, ginpaguwa sang AFP nga may yara sang nakumpiskar nga mga armas, bala kag palupok halin sa mga biktima.

Pag-aresto. Gin-aresto kag gintilawan nga taguon sang mga pwersa sang 3rd Special Forces Battalion ang lider-Lumad Manobo nga si Michelle Campos kag tatlo pa niya ka kaupod. Nagabyahe sila sadtong Marso 5 sang gab-i sa Barangay Das-agan, San Francisco, Agusan del Sur. Naka-estorya lang sila sang mga grupo sang tawhanon nga kinamatarung sadtong Marso 11 sa isa ka ospital sa Prosperidad.

Samtang, wala pa mahibaluan ang nahamtangan sang lider-Lumad nga si Genasque Enriquez nga gin-aresto sadtong Marso 2. Sila Campos kag Enriquez mga kilala nga tigtib-ong sang kinamatarung sang ila komunidad sa Lianga, Surigao del Sur batuk sa mga dalagko nga korporasyon sang pagmina kag pagtroso.

Pagpangkastigo. Gindakop kag ginkastigo sang 94th IB si Alberto Piaduche sadtong Marso 9 sang gab-i samtang sakay sa motorsiklo sa Sityo Tuyuman, Barangay Caradio-an, Himamaylan City sa pasibangod nga sila mga katapo sang BHB. Kaupod niya sadto ang isa pa ka himata. Suno sa report, pwersa nga ginpasakay sa isa ka pick-up truck ang duha kag gindala sa sulod sang hedkwarters sang militar. Didto ginkastigo si Piaduche kag ginpaako nga may angot sa hukbo sang banwa. Ginbuhian sila sang magtungang gab-i.