Isa ka bulan nga nagpatapo sa isa ka yunit sang Bagong Hukbong Bayan (BHB) sa Southern Tagalog sila Ka Cloud kag Ka Malen bilang kabahin sang ila “tour of duty” ukon TOD. Ang “TOD” integrasyon ukon kaupod nga magpangabuhi lain-lain nga pagtawag sa paglubog sang mga katapo sang rebolusyonaryong organisasyon masa kag Partidista halin sa kasyudaran sa BHB agud makaangkon sang kongkreto nga eksperyensiya sa armadong rebolusyon.

Halin sa sahing petiburges sila Ka Cloud kag Ka Malen. Wala sila naanad sa kabuhi sa kabukiran. Masami sila nga nabudlayan ilabi na sa paglakat, apang malipayon pa gihapon nga nagpangahas nga mag-adoptar sa gawi sang hukbo. Naga-upod sila sa pagbagtas sa matag-as kag madanlog nga tereyn, paghilikuton masa, paghanas militar kag pagtungod sa mga hilikuton teknikal.

Para kay Ka Cloud, pinakamaayo nga mga tawo nga nakilala niya ang nakaupod nga mga Pulang hangaway. Nasaksihan niya ang pag-desisyon sang mga hangaway sa atubang sang madamo nga panghangkat sang kabuhi gerilya. Nakita niya ang pagkaseryoso sang Pulang hukbo sa pagpatuman sang kahublagan panadlong kag pagpangibabaw sa mga kahuyangan.

Samtang napatapo, naghanas si Ka Cloud bilang upisyal sa lohistika. Nangin responsibilidad niya ang pag-imbentaryo sang suplay, pagpagana sang kusina kag pagseguro sang pagkaon sang yunit. Aga pa, mabatian na ang pag-abi-abi sa kusina sang “Good morning, mga kaupod!” ni Ka Cloud.

Lubos naman ang pagpasalamat ni Ka Malen sa pagbulig kag paghangup sang mga kaupod sa iya mga kabudlayan sa pag-adoptar sa kabuhi sa sona. Naghanas siya bilang giya pangpulitika sang iya pormasyon. Nakita niya diri ang lugar sang banggianay sang mga ideya kag sawayanay sang mga kaupod sa espirito sang kahublagan panadlong. Nakita niya kon paano ang pag-alalay sang mga kaupod sa isa kag isa.

Sa adlaw sang paghalin sang duha, naglunsar sang kapehan ang yunit agud tasahon ang ila pakighalubilo sa hukbo. Bisan malip-ot ang ila pagtiner, nakakuha sang mga leksyon kag inspirasyon ang duha kag ang mga Pulang hangaway nga nagsapupo sa ila. Pasalig sang duha nga sa ila pagbalik diin man nga larangan gerilya, makapaupod sila sang iban pa nga pamatan-on.

Pamatuod ang inagihan nila Ka Cloud kag Ka Malen nga indi upang sa mga rebolusyonaryo sa kasyudaran ang kakulangan sa kahanason para mangin Pulang hangaway. Nagahulat ang mga larangan gerilya kag handa ang mga Pulang hangaway nga maghanas sa mga pamatan-on sa syudad nga magpangahas nga magpatapo sa hukbo sang banwa.