Nag-arangkada na ang pinakadalagko nga war games ukon paghanas sa gyera sang imperyalismong US sa rehiyon sang Asia Pacific subong nga 2025. Ginsugdan sang US sa Republic of Korea (ROK) sadtong Marso 10 ang Freedom Shield war games samtang natalana nga ipatigayon ang pinakadako nga Balikatan war games sa Pilipinas sa maabot nga mga binulan. Ginapatigayon ini kadungan sang madamo pa nga mas magagmay nga war games kag aktibidad sang militar sang US sa lain-lain nga bahin sang rehiyon.

Ang mga war games nga ini ginapaguwa nga mga “ehersisyo pangdepensa” kag pagpabaskog sang alyansa. Ang matuod nga katuyuan sang mga ini amo ang pabaskugon ang “interoperability” ukon kontrol sang mga militar sang US sa mga pwersang militar sang Pilipinas kag iban nga pungsod. Ginagamit man ang mga ini sang US para ipabilin ang kontrol sa rehiyon kag mas nga pasingkion ang tensyon sa kasumpong sini nga imperyalistang pungsod nga China kag sa North Korea.

Freedom Shield 25

Indi magnubo sa 19,000 ka pwersang militar sang South Korea kag US ang nagpakigbahin sa Freedom Shield (FS) 25 nga naglawig sang 11 ka adlaw ukon tubtob Marso 21. Yara sa 17 ka gin-isa nga mga war games, halin sa 10 ka war games sadtong 2024, ang igalunsar subong nga tuig. Naglunsar sang lain-lain nga tipo sang paghanas militar ang tropa sang US kag South Korea lakip ang mga live-fire (pagkarga sang matuod nga mga bala ukon artileriya) exercises sa kadutaan, katubigan kag kahawaan sa pungsod.

Ang tuigan nga war games nga ini ginakabig sang Democratic People’s Republic of Korea (DPRK ukon North Korea) bilang “paghanda para sa pagpanakop” sa ila pungsod sang mga pwersang militar sang US kag South Korea. Bilang sabat kag pagpakita sang determinasyon nga pangapinan ang pungsodnon nga sobereniya sini, nagpalupad ang DPRK sang mga ballistic missile sa kadagatan.

Antes ang FS25, wala-tuo na ang ginapatigayon sang US nga aktibidad militar. Isa diri ang ginhiwat sadtong Marso 5, kon diin nabomba sang US kag South Korea ang komunidad sa Nogok-ri, banwa sang Pocheon, Gyeonggi tungod sa sayup nga koordineyt (lokasyon) nga nabutang sa mga kompyuter sang jet fighter. Walo ka bomba nga MK-82 (nga may bug-at nga 500 libras) ang “aksidente” nga ginhulog sang eroplano panggyera.

Indi magnubo sa 30 ka sibilyan ang napilasan sa insidente. Madamo nga mga kabalayan kag imprastruktura ang naguba samtang nagtuga sang grabe nga troma kag kahadlok sa mga residente.

Nagpanindugan ang meyor sang Pocheon nga indi dapat magpatigayon sang kasubong nga mga war games sa ila banwa tubtob indi maseguro sang militar nga indi masulit ang pareho nga aksidente. Tatlo ka dalagko nga pasilidad militar, nga sakup ang 4,960 ektarya nga duta,ang yara sa banwa sang Pocheon.

Paghanda sa Balikatan Exercises “SABAK” 2025

Sa pagsugod pa lang sang 2025, nag-arangkada na ang paghanda sang Armed Forces of the Philippines (AFP) kag mga pwersa sang US para sa tuigan nga Balikatan war games sa Pilipinas. Nakatalana nga ilunsar ang ika-40 nga serye sang Balikatan sa teritoryo sang Pilipinas sa Abril kag Mayo. Ginbansagan ang Baliktan subong nga tuig bilang SABAK 2025. Ginasigahum nga lapawan pa sini ang 16,000 tropang Pilipino kag Amerikano nga nagpakigbahin sa nagligad nga tuig.

Sa anunsyo sang AFP, magluwas sa pagpakigbahin sang tuman ka dako nga isip sang mga soldado sang US magpakigbahin man ang armadong pwersa sang Australia, Japan kag iban pa nga mga pungsod. Sadtong 2024 may mga opisyal militar sang 14 pa ka mga pungsod ang nagserbe nga “tig-obserbar” sa war games. Nagapanguna nga ginapatigayon ang mga war games sa Luzon kag Palawan.

Bilang paghanda, ginlunsar sang AFP ang Combined Arms Training Exercise (CATEX) “Katihan” Battle sadtong Marso 3 tubtob Marso 12. Nagpakigbahin ang 6,000 ka soldado nga Pilipino.

Pila ka serye man sang mga maniobrang militar ang ginlunsar sang Pilipinas kaupod ang US, Australia, Japan kag Canada sa kadagatan kag kahawaan sang Pilipinas.

Sadtong Pebrero 21, nakig-pulong ang hepe sang AFP sa kumander sang US Indo-Pacific Command. Ginhiwat man ang mga pulong sang AFP sa mga upisyal kag pwersa sang Japan, France, kag Germany sa nagligad nga kwarto.