Naduso sang 74 oras nga welga sang Nexperia Philippines Inc. Workers Union ang kapitalista sang multinasyunal nga kumpaniya nga hatagan sang konsesyon ang mga mamumugon sa pakig-negosasyon sini para sa bag-o nga collective bargaining agreement. Nag-agay ang kapitalista pagkatapos naglab-ot sa ginabana-bana ₱1.26 bilyon ang nadula nga kita sang kumpaniya tungod sa welga halin Marso 5 sang hapon tubtob Marso 8.

Ginsug-alaw sang suporta ang mga welgista sang mga pareho nga mamumugon kag iban nga organisasyon sa guwa sang Light Industry and Science Park 1 sa Cabuyao City, Laguna. Naagum sang unyon ang pagpabalik sa trabaho sa pangulo sang NPIWU nga si Mary Ann Castillo kag isa pa ka upisyal sang unyon nga ginsisante. Nakuha man sang unyon ang dugang nga ₱17 kada adlaw para sa 2024, ₱19 para sa 2025, ₱21 para sa 2026 kag ₱20,000 signing bonus. Maathag man nga nasulat sa kasugtanan nga ginadumilian ang bisan ano nga tikang-balos sa mga mamumugon nga nagpakigbahin sa welga.

Suno kay Castillo, madinalag-on ang ila welga tungod madamo ang nakamuklat sa kahimtangan sang mga mamumugon sa Nexperia kag nagpakig-isa sa ila away. Dugang pa niya, nagbaskog ang balatyagon sang mga unyonista kag handa sila nga mas pa nga makig-away para sa ila mga kinamatarung.