Labi nga ginkalipay sang pumuluyong Pilipino nga nagahandum sang hustisya ang pag-aresto kag pagbilanggo sa anay lider tirano nga si Rodrigo Duterte sa mga pasilidad sang International Criminal Court (ICC) sa pungsod nga The Netherlands sadtong Marso 11. Isa ini ka dako nga kadalag-an, indi lang para sa mga biktima sang lapnagon nga pagpamatay nga ginmando ni Duterte sa balayon sang “gyera sa droga,” kundi para sa tanan nga biktima sang pasistang pagpanalasa sa idalum sang iya terorista nga paghari.

Ginbukas sini ang posibilidad nga mapasabat kag masilutan si Duterte sa iya mga krimen sa katawhan, butang nga halos imposible sa idalum sang garuk nga nagahari nga sistema sa pulitika kag hustisya sa Pilipinas.

Walo ka tuig na ang nakaligad halin sang sugdan ang kaso sa ICC. Labi pa ini nga nagdugay tungod sa pagdumili sang rehimen Marcos nga makigbuligay sa ICC halin 2022 tungod sa pakig-alyansa sadto ni Marcos sa mga Duterte. Subong na lang, nga lubos nga nadula ang alyansa nga ini, nagpasugot si Marcos nga hatagan ligwa ang ICC agud magamit ini (pati na ang pagkakas kay Sara Duterte) sa pagtinguha niya nga ikonsolida ang iya gahum kag dulaon ang dalagko nga upang sa pagtinguha niya nga palawigon ang paghari nga lapaw pa sa 2028.

Ang matuod, bungol pa gihapon si Marcos sa singgitan sang banwa para pasabton si Duterte sa iya mga krimen, pareho nga bungol siya sa mga singgit para sa hustisya sa tanan nga paglapas sa tawhanon nga kinamatarung sa panahon sang paghari sang diktador niya nga amay. Ang mga pasistang patakaran sang rehimen Duterte amo man gihapon ang ginapatuman subong ni Marcos Jr para sa lapnagon nga pagpangsumpo sa pumuluyo nga nagabato.

Ginapondohan subong sang mga Duterte ang isa ka sistematiko kag lapnagon nga kampanya sang disimpormasyon kag peke nga pagbalita sa social media. Agud makuha ang simpatiya sang publiko, ginapaguwa subong sang kampong Duterte nga “makaluluoy” kag “biktima” sang pangpulitika nga pagpang-ipit ang anay lider pasistang tirano, kag nga ang pag-aresto sa iya lapas sa layi kag sobereniya sang pungsod. Ginagamit ini indi bilang mga argumento sa ICC, kundi para gatungan ang emosyon sang mga maka-Duterte, kag makapabuylo sang mga rali.

Ginatabunan nila ang pila ka libo nga kalabera sang mga biktima sang pagpamatay sa panahon sang brutal nga paghari ni Duterte. Target sang pagpangdutdot kag pagpanghadlok bisan ang mga biktima kag ila mga pamilya. Gintago nila ang kamatuoran nga gingamit ni Duterte ang gahum sa tabon sang “gyera sa droga” agud kontrolon ang suplay sang droga kag ang pagka-agalon sang tanan nga drug lord sa Pilipinas. Ginapanas nila sa panghuna-huna sang katawhan kon paano sila mas nga nagpamigado kag nag-antus sa mga patakaran nga kontra-mamumugon, kontra-mangunguma, kontra-imol kag kontra-nasyunal ni Duterte, kadungan ang tuman ka lala nga korapsyon kag pagkamal sang manggad sang iya pamilya kag alipures.

Malayo pa ang away sa ICC sang mga biktima kag pumuluyong Pilipino. Magaagi pa ini sa madamo nga pagsikot-sikot. Dapat engganyuhon kag buligan nga maghambal kag mag-testigo ang linibo pa ka biktima kag saksi agud pabaskugon ang kaso sa ICC kag ang panawagan nga silutan si Duterte kag tanan niya nga kahimbon sa ila mga krimen.

Sa pagbista kay Duterte sa ICC, nagbukas ang bag-o nga patag sang paghimakas para sa pagpasabat sa mga buang nga diktador, tirano kag mga naputos sa salsalon nga pasista, nga halos imposible nga masilutan sa idalum sang mga reaksyunaryong korte sa Pilipinas. Nagakadapat nga suportahan kag pabaskugon ang panawagan nga liwat magpatapo ang Pilipinas sa ICC kag iduso ang rehimen Marcos nga himuon ini. Sa atubang sang indi patas nga pagluntad kag pagpatuman sang layi sang papet nga estado sa Pilipinas, ang liwat pagpatapo sa ICC pabor sa linibo ka biktima sang pasistang pagpangsumpo kag terorismo sang estado nga nagahandum sang hustisya. Kadungan sini, dapat handaan ang pagpasaka sang mga kaso sa ICC batuk kay Marcos, sa mga upisyal sang AFP kag PNP, sa mga kumander sang mga dibisyon kag batalyon, nga pasimuno sang mga krimen batuk sa katawhan kag krimen sa gyera.

Kadungan sini, dapat padayon nga tigayunon ang lapnagon nga propaganda kag edukasyon agud iduso ang pagpasabat kay Duterte kag pagsukot kay Marcos sa nagapadayon nga pasistang pagpangsumpo, pagpaantus sa pumuluyo, korapsyon kag pagsunod-sunod sa dumuluong imperyalistang interes. “Marcos-Duterte, wala sang kinatuhay” sa mga malala nga krimen sang ekstrahudisyal nga pagpamatay, pag-abdak, tortyur, pagpangpriso kag pagpasaka sang mga himo-himo nga kaso kag pagpangtanum sang ebidensya, batuk sa pumuluyo nga nagahimakas. Dapat padayon nga pabaskugon ang pakig-away kay Marcos kag sa mga upisyal sang militar nga pulis nga padayon sa pasistang pagpamayagpag kag pagpamintas sa pumuluyo.

“Marcos-Duterte, wala sang kinatuhay” sa pagpaantus sa pumuluyong Pilipino. Wala sang nabag-o sa padayon nga pagsaka sang presyo sang mga balaklon, lapnagon nga disempleyo, kag pagbagsak sang palangabuhian sang mayoriya sang pumuluyo. Wala sang nabag-o sa mga paantus nga patakaran nga paglansang sang manubo nga sweldo sang mga mamumugon, madamuan nga pag-import sang bugas kag iban pa nga produktong pang-agrikultura sa kahalitan sang lokal nga produksyon, kag pagpabor sa mga dumuluong kapitalista nga manugkawkaw sa manggad sang pungsod kag nagaguba sang kapalibutan. Wala sang nabag-o sa wala-pugong nga pagpangutang, korapsyon sa mga kontrata sang gobyerno, ismagling, kag sosyohan sa mga kartel kag mga sindikato nga kriminal.

“Marcos-Duterte, wala sang kinatuhay” sa pagganoy sa kagamo sang US kag China. Sa idalum ni Marcos, mas nga naghari-harian ang mga pwersang militar sang US sa Pilipinas, kag mas nga nagdako ang peligro nga madalahig ang pungsod sa gyerang imperyalista, kadungan ang nagadako nga papel sang US sa pagsuplay sang mga armas kag kagamitan sa AFP nga gamit sa gyera sang pagpangsumpo batuk sa pumuluyo.

Sa katapusan, ang matuod nga pagbag-o nga handum sang pumuluyo malab-ot lang paagi sa rebolusyonaryong pagbag-o sa Pilipinas. Padayon nga nagatindog kag nagapakig-away ang pumuluyong Pilipino nga ginapaantus sang imperyalismo, pyudalismo kag burukrata kapitalismo. Dapat ibagsak ang garuk nga reaksyunaryong neokolonyal nga estado sang dalagko nga burgesya kumprador, dalagko nga agalon mayduta kag burukrata kapitalista.

Para maagum ang ginahandum nga hustisya kag matuod nga kahilwayan, dapat ubos-kusog nga suportahan, isulong kag pasingkion sang pumuluyong Pilipino ang armadong paghimakas sang Bagong Hukbong Bayan. Paagi lang sa pagdaog sang inaway banwa maseguro nga mahatagan sang hustisya ang tanan nga biktima sang pagpamigos kag paghimulos kag maagum ang ginahandum nga pungsodnon nga kahilwayan, demokrasya kag sosyalistang palaabuton.