Ibalik ang mga tahungan sa Novotas. Nagkadto sa city hall sang Navotas ang mga mangingisda kag manugtahong sa idalum sang Pamalakaya sadtong Marso 14, agud igiit sa lokal nga gobyerno nga pasugtan sila nga ibalik ang ila mga tahungan. Sa adlaw man nga ini sadtong nagligad nga tuig, gindemolis sang gobyerno ang ila mga tahungan sa tabon sang “rehabilitasyon” sang Manila Bay. Masobra 200 ka tahungan ang gindemolis sadtong nagligad nga tuig agud hatagan ligwa ang 650-ektarya nga proyekto nga reklamasyon sang San Miguel Corporation sa Navotas.

Hustisya para sa mga residente sa Balubad. Nagmartsa sa Angeles City sa Pampanga ang mga residente sang Sityo Balubad, Barangay Anunas sadtong Marso 12 agud magpanawagan sang hustisya sa mapintas kag iligal nga demolisyon sa ila komunidad sadtong Marso 12, 2024. Sa demolisyon sadtong nagligad nga tuig, 600 ka pamilya kag 48 ka mangunguma nga benepisyaryo sang certificate of land ownership award ang ginpalayas halin sa ila duta.

Mga konsyumer batuk sa mataas nga presyo. Gintay-og sang protesta sang lain-lain nga mga grupo nga kabahin sang Samahan at Ugnayan ng mga Konsyumer Para sa Ikauunlad ng Bayan (Suki Network) sadtong Marso 14 ang mga merkado sa Metro Manila agud ipanawagan ang pagpanubo sa presyo sang pagkaon, balaklon kag mga yutilidad. May yara man sang separado nga protesta ang pamatan-on estudyante kaupod ang mga mamumugon agud pamatukan ang pagsaka sang sukot sa pasahe sa tren.