Matuod nga napanahon kag mapanghangkat ang pagbantala sang Ulos 2024. Matuod gid nga isa ka syensya kag arte man nga makabig ang makapasanto kag makasabat sa mga ano, nga-a kag paano sang subong nga konteksto sang aton paghimakas paagi sa mga obra nga mga binalaybay, teatro, balagtasan, liriko sang kanta, drowing kag dibuho.

Masiling nga nangin epektibo ang mga pinili nga sinulat kag dibuho sa Ulos 2024 tungod nakatuga ini sang nanari-sari nga paghangup ukon impresyon sa mga manugbasa. Maka-igo sa kasing-kasing ang mga binalaybay, sulat kag sanaysay-pasidungog para sa mga nauna na nga mga kaupod nga nangin “mabanaag” kag “matinugahon” ang kabuhi tungod sa pagtungod sang indi mapakapanubo nga mga misyon kag katungdanan para sa pungsodnon-demokratikong rebolusyon. Ginadala sang mga pahina sini ang mga manugbasa sa maukod nga pagtan-aw sang lain-lain nga kontradiksyon personal kag sosyal apang sa katapusan mapaathag sini ang kahustuhon sa pagpili sang gin-usoy labaw sa pangkaugalingon nga handum sang pagrebolusyon para sa pungsod kag sa sahi.

Nangin madinalag-on ang agos sang mga sinulat kag arte-biswal agud dal-on sini ang manugbasa sa mas mataas nga paghangup, mas mataas nga moral kag mas resolbado nga determinasyon para mangin tigpasulong sang kultura sang pagpanadlong.

Sa amo sini nga espirito gani tayuyon dapat ang kampanya kag panawagan nga basahon ang bug-os nga libro sang Ulos! Idungan ang pagbasa sini sa mga pagbasa sa mga sandigan nga dokumento nga kinahanglan nga tun-an kag analisahon. Tuman ka ayo nga gamiton ang mga sinulat bilang inspirasyon samtang ginapatigayon ang mga pulong imbestigasyon, pag-id-id sa mga pagsuma, pagsaway kag pagsaway sa kaugalingon kag iban pa nga hilikuton sa ideolohiya, pangpulitika kag organisasyon.

Sa panahon subong, labi na sa kasyudaran, ang oras nga ginahatag para sa pagbasa, pag-analisa, pagtuon kag hilikuton masa nangin patag na sang banggianay tungod sa kontra-agos nga impluwensya sang indi husto nga paggamit sa internet kag social media. Suno pa sa pasiuna sang Ulos 2024, “ang pagbag-o sang panghuna-huna kag gawi, indibidwal kag kolektibo, isa ka hilikuton pang-kultura.” Kon kinahanglan nga magbag-o sang kaugalingon sa paggamit sang internet kag social media, himuon ini. Kon kinahanglan nga kritikal nga isikway ang mga petiburges nga impluwensya halin sa lain-lain nga materyal kag instrumento nga nagasalakay sa aton proletaryo nga espirito kag gawi, kinahanglan ini nga pangibabawan. Isa ka kultura nga nagapanindugan batuk sa suhetibismo kag mga petiburges nga panghuna-huna kag gawi nga ululupod naton nga kritikal kag matinugahon nga isulong!