Walay hunong ang pasistang pag-atake sa rehimeng Narendra Modi sa India batok sa katawhang Adivasi, mga pwersang demokratiko, ug rebolusyonaryong grupo sa ngalan sa Operation Kagaar. Anaa sa ika-15 ka bulan na ang brutal nga operasyong kontra-insurhensiya nga mikutlo sa kinabuhi sa dili moubos sa 400 ka sibilyan, mayorya mga Adivasi o katutubong katawhan ug mga rebolusyonaryo.

Sa mga taho, 287 ang gipatay niadtong 2024 ug anaa sa 113 na karong 2025. Mga Adivasi ang 1/3 sa mga biktima samtang 40% mga babaye. Daghan sa mga kaso sa pagpatay ginapagawas nga nahitabo sa mga “engkwentro” sa armadong pwersa sa reaksyunaryong estado sa India ug sa People’s Liberation Guerilla Army (PLGA) sa Communist Party of India (Maoist).

Dili luwas ang mga bata sa hugaw nga gubat sa rehimeng Modi. Niadtong 2024, 14 ka mga batang edad 14-anyos paubos ang gipatay, lakip ang usa ka 6-ka-bulang bata.

Gisugdan ang Operation Kagaar niadtong Enero 2024 sa Abujhmaad, usa ka bukiron ug lasangong bahin sa rehiyon sa habagatang estado sa Chhattisgarh nga anaa sa sentral nga India. Pinakagrabe ang operasyon sa pito ka distrito sa Bastar. Gitarget niini ang mga Adivasi nga nagasupak sa pagsulod sa mga korporasyong multinasyunal sa yutang kabilin.

Sa 15 ka bulan, dili moubos sa 13 ka dagkung operasyong militar ang gihimo sa Bastar, gamit ang dili moubos sa 1,000 ka pwersa sa kada operasyon. Gatusan ka mga kaso sa paglapas sa tawhanong katungod ang nataho sa maong panahon. Tungod dinhi, gitawag ang lugar isip “Bastar Killing Fields.”

Adunay 300 ka kampo militar sa Bastar kung asa gibanabanang 50 ang gitukod atol sa Operation Kagaar. Sa langkub sa Abujhmaad, adunay siyam ka kampo militar. Sa kadaghan niini, adunay kampo sa kada 2-3 kilometro. Kini ang nagsilbing sentro sa operasyong kontra-insurhensiya sa mga suuk nga lugar. Adunay usa ka pwersa sa estado sa kada siyam ka sibilyan sa Bastar.

Aron makmakon ang terorismo sa estado, nagtapok ang mga grupo sa Delhi sa pagpanguna sa Forum Against Corporatization and Militarization (FACAM) niadtong Marso 26. Matud kang Prof. Saroj Giri sa FACAM, labaw nga migrabe ang pasistang atake sa Brahmanical Hindutva pasistang rehimeng Modi sa Bastar tungod sa organisadong pagsukol sa mga Adivasi ug mag-uuma. Ginababagan sa ilang pakigbisog ang pagpangawkaw sa dagkung korporasyon sa rehiyon.

Ang gubat sa mga Adivasi ug ang Operation Kagaar kabahin sa kinatibuk-ang pagpagrabe sa pasismo sa estado sa India ilalum sa Surajkund Scheme (2022). Ginapaypayan niini ang panatisismo sa relihiyon alang sa pasistang pagpanumpo. Ginagamit niini ang takuban sa “Vision 2047 for Viksit Bharat” aron magtukod og “Hindu Rashtra” o nasud nga Hindu.

Panawagan alang sa kalinaw

Atubangan sa mga pag-atake, nagtapok ang mga demokratikong sektor sa Hyderabad, Telengana niadtong ulahing semana sa Marso aron ipanawagan sa estado ni Modi nga makignegosayon para sa kalinaw sa CPI (Maoist). Pipila ka adlaw human niini, mitubag ang CPI (Maoist) ug nagpadayag sa kaandamon nga mosalmot sa negosasyon.

Pinaagi ni Kasamang Abhay, tigpamaba sa partido, gihikyad sa CPI (Maoist) ang upat ka mga kundisyon alang sa negosasyon. Naghanyag usab ang partido og hunong-buto kung positibong tubagon sa rehimeng Modi ang panawagan alang sa panaghisgot kalinaw.

Una, giduso niini ang paghunong sa Operation Kagaar nga nagapatay sa mga sibilyan. Ikaduha, gipahunong niini ang pagtukod og mga bag-ong kampo militar ug ipapondo sa nagtunhay nga mga kampo ang mga sundalo. Ikatulo, ihunong sa estado ang pagpagula og bag-ong mga Memorandum of Understanding o permit sa mga korporasyon nga mangawkaw sa kinaiyahan. Ug ikaupat, buhian ang tanang mga bilanggong pulitikal nga giaresto tungod sa pagsukol sa korporatisasyon ug militarisasyon.

Gisuportahan sa lain-laing demokratikong organisasyon ang kaandam sa CPI (Maoist) nga mosulod sa panaghisgot kalinaw sa ngalan sa kaayuhan sa katawhang Indian. Apan sama sa gilauman, dayag kining gikontra sa reaksyunaryong estado. Matud niini, makig-estorya lamang sila sa partido kung magpadayag kini og pagsurender.

Atubangan niini, determinado ang CPI (Maoist) ug PLGA nga ipadayon ang ilang armadong pakigbisog hangtud dili matubag ang batakang mga problema sa katawhang Indian.