Awan-sarday ti pasista a panagraut ti rehimen Narendra Modi ti India laban iti umili nga Adivasi, dagiti pwersa a demokratiko ken rebolusyonaryo a grupo iti nagan ti Operation Kagaar. Addan iti maika-15 bulan ti brutal nga operasyon a kontra-insurhensya a nangkettel iti biag ti saan a bumaba iti 400 sibilyan, kaadwan ket dagiti Adivasi wenno katutubo nga umili ken dagiti rebolusyonaryo.

Kadagiti ulat, 287 ti napapatay idi 2024 ken addan 113 tatta 2025. Inkatlo (1/3) kadagiti biktima ket katutubo nga Adivasi bayat a 40% ket babbai. Adu kadagiti kaso ti pammapatay ket parparwaren nga “engkwentro” ti armado a pwersa ti reaksyunaryo nga estado ti India iti People’s Liberation Guerilla Army (PLGA) ti Communist Party of India (Maoist).

Saan a nailisi dagiti maladaga ken ubbing iti narugit a gera ti rehimen Modi. Idi 2024, 14 nga ubbing nga agtawen 14-anyos pababa ti pinapatay daytoy, karaman ti 6-bulan a maladaga.

Narugian ti Operation Kagaar idi Enero 2024 idiay Abujhmaad, maysa a nabantay ken nabakir a rehiyon iti abagatan ti estado ti Chhattisgarh nga adda iti sentral nga India. Kakaruan ti operasyon iti pito a distrito ti Bastar. Tinarget daytoy dagiti Adivasi a lumablaban iti pannakibiang dagiti korporasyon a multinasyunal iti ansestral a daga.

Iti 15 a bulan, saan a bumaba iti 13 a dadakkel nga operasyon militar ti naiyaramid iti Bastar, usar ti saan a bumababa iti 1,000 pwersa iti kada operasyon. Ginasut a kaso ti panaglabsing iti karbengan-tao ti nailista iti didiay a panawen. Gapu ditoy, naawagan ti lugar kas “Bastar Killing Fields.”

Adda 300 a kampo militar idiay Bastar nu sadinno a 50 ti mapatta-patta a naipatakder iti panawen ti Operation Kagaar. Iti sakupen ti Abujhmaad, adda ti siyam a kampo militar. Iti kaadu dagitoy, adda kampo iti tunggal 2-3 kilometro. Dagitoy ti agserserbi a sentro ti operasyon a kontra-insurhensya kadagiti nasulinek a lugar. Adda ti maysa a pwersa ti estado iti tunggal siyam a sibilyan iti Bastar.

Tapno babalawen ti terorismo ti estado, nagtitipon dagiti grupo idiay Delhi iti panangiyuna ti Forum Against Corporatization and Militarization (FACAM) idi Marso 26. Segun ken Prof. Saroj Giri ti FACAM, bin-ig a kumarkaro ti pasista nga atake ti Brahmanical Hindutva a pasista a rehimen Modi iti Bastar gapu iti organisado a panaglaban dagiti Adivasi ken mannalon. Laplapdan dagiti dangadang da ti panaggamrud ti dadakkel a korporasyon iti rehiyon.

Dagiti gera kadagiti Adivasi ken ti Operation Kagaar ket paset ti kabuklan a panangpakaro ti pasismo ti estado ti India iti sidong ti Surajkund Scheme (2022). Paypaypayan daytoy ti panatisismo iti relihiyon para iti pasista a panagikuspil. Ar-aramaten daytoy ti parupa a “Vision 2047 for Viksit Bharat” tapno agbukel ti “Hindu Rashtra” wenno pagilyan a Hindu.

Panawagan para iti kapya

Iti sango dagiti panagatake, nagtitipon dagiti demokratiko a sektor iti Hyderabad, Telengana idi maudi a lawas ti Marso tapno ipanawagan iti estado ni Modi a makipagsarita para iti kapya iti CPI (Maoist). Mano nga aldaw kalpasan daytoy, simmungbat ti CPI (Maoist) ken nagiyebkas ti kinasagana a pumauneg iti saritaan.

Babaen ken Kadwa Abhay, tagapagsarita ti partido, indatag ti CPI (Maoist) ti uppat a kundisyon para iti negosasyon. Nagidiaya met ti partido ti panagsardeng ti rinnupak nu positibo a sumungbat ti rehimen Modi iti awag para iti saritaan pangkapya.

Umuna, iruprupir daytoy ti panagsardeng ti Operation Kagaar a mangpappapatay kadagiti sibilyan. Maikadwa, ipaspasardeng daytoy ti panagitakder kadagiti baro a kampo militar ken agtalinaed kadagiti agraraira a kampo dagiti soldado. Maikatlo, isardeng ti estado ti panagiruar kadagiti baro a Memorandum of Understanding wenno permit kadagiti korporasyon tapno agrames iti law-ang. Ken maikapat, ruk-atan ti amin a balud pulitikal a naaresto gapu iti panaglaban iti korporatisasyon ken militarisasyon.

Sinuportaran ti nadumaduma a demokratiko nga organisasyon ti kinasagana ti CPI (Maoist) a sumrek iti saritaan iti kapya iti nagan ti pagimbagan ti umili nga Indian. Ngem kas ti namnamaen, dagus a kinontra daytoy ti reaksyunaryo nga estado. Kuna daytoy, makisarita da laeng iti partido nu agipablaak ti panagsuko.

Iti sango daytoy, determinado ti CPI (Maoist) ken PLGA nga ituloy ti armado a dangadang da agingga a saan a masungsungbatan dagiti basaran a parikut ti umili nga Indian.