Nakighiusa ang Partido ug ang Bagong Hukbong Bayan sa umalabot nga pagsaulog sa ika-52 nga anibersaryo sa National Democratic Front sa Abril 24. Daygon ug saulugon nato ang mga nakab-ot ug mga kadaugan sa NDF sa kapin lima ka dekadang paghiusa sa katawhang Pilipino, sa pagpasiugda ug pagrepresenta sa ilang nasudnon ug demokratikong mga pangandoy, ug pagpaasdang sa demokratikong rebolusyon sa katawhan pinaagi sa gubat sa katawhan.

Dili malimod ang dakung kahulugan karon sa pagsaulog sa adlaw sa pagtukod sa NDF. Isip labing konsolidadong bahin sa nasudnong nagkahiusang prente ug lig-ong uyok sa patriyotikong prente sa katawhang Pilipino, mahinungdanon kaayo karon nga militante ug lig-on nga mobarog ang NDF. Kini atubangan sa nagkagrabeng interbensyon ug nagkahugot nga kontrol sa imperyalismong US sa militar, pulitika, ekonomiya ug kultura sa nasud, taliwala sa gipagrabe niining pakiglantugi sa imperyalistang karibal nga China. Dala niini ang walay kapares nga kadaut, pag-antus ug hulga sa kagawasan, seguridad ug dignidad sa katawhang Pilipino.

Kinahanglang tukuron sa NDF ang lapad nga panaghiusa sa katawhan batok sa mini nga “deterrence policy” o palisiya sa pagpakita og kusog nga pwersang militar sa US aron kuno pugngan ang China nga moatake. Ilalum niini nga palisiya, ginagamit sa militar sa US ang Balikatan ug daghang mga war games, aron ipwesto ang mga armas ug tropa niini sa lain-laing bahin sa nasud. Laraw niini dili ang pugngan ang atake sa China, kundili ang hadlukon ug hagiton kini.

Sentro karon sa pokus sa US ang Batanes kung asa gideploy ang nagkadaghang misayl niini nga nakation sa China. Adlaw-adlaw usab ang pagsulod-gawas sa mga higanteng barkong iggugubat sa US sa lain-laing bahin sa Pilipinas nga miagni sa nagkadaghang barko sa China sa South China Sea ug exclusive economic zone sa Pilipinas. Gibira sa US sa Pilipinas ang mga armadong pwersa sa Japan, Australia, France ug uban pang alyadong imperyalistang nasud.

Todo-todo ang pagsunod-sunod sa papet nga rehimeng Marcos sa dikta sa US. Gipagamit niini sa US ang AFP aron magsilbing alalay sa mga pwersang militar sa US. Hingpit nga ginagamit sa US ang Pilipinas isip proxy sa ginahimo niining pagpanghagit sa China. Nagpagamit ang traydor nga si Marcos sa US sa paghagit ug pagsabong sa China, imbes nga barugan ang interes sa mga Pilipino nga makahimo og mahigalaon ug malinawong relasyon sa silingang China.

Kinahanglang manguna ang NDF sa pagpakusog sa pagbatok sa katawhan sa langyawng pagpangawkaw ug dominasyon sa ekonomiya. Kinahanglan kining magsilbing kusog nga tingog sa pagbatok sa paggamit sa gubyernong Trump sa hulga sa mga taripa batok sa mga produktong ginaimport gikan sa Pilipinas, para labawng ablihan ang nasud isip han-okanan sa mga sobrang produkto sa US.

Kinahanglang kusganong batukan sa NDF ang rehimeng Marcos sa mga neoliberal nga ekonomikanhong palisiya niini nga nagahatag sa mga langyawng dagung kapitalista ug kasosyong dagkung negosyo sa dagkung gahum nga mangawkaw og yuta, huthuton ang natural nga bahandi sa nasud, gun-ubon ang kinaiyahan ug ilubong ang nasud sa utang. Kinahanglan niining singlon ang imperyalismong US ug neokolonyal nga estado sa pagpabiling atrasado sa ekonomiya ug lokal nga produksyon, ug pagpaantus sa masa sa katawhan.

Walay hunong karon ang saywar ug kontrol sa kultura sa imperyalismong US sa pagmanipula sa hunahuna ug kahimatngon sa katawhang Pilipino. Gamit ang midya ug social media, ginapagawas nila nga sila “higala, kaabag ug alyado” sa katawhang Pilipino, ug gitabunan ang walay-puas nga pagyatak sa kaugalingnan sa nasud. Kakunsaba ang rehimeng Marcos, ginasugnuran sa US ang Sinophobia o sentimyentong anti-China, ug gibalik-balik ang pag-ila sa nasud isip “kaaway” o “hulga.”

Kining tanan kabahin sa nagkagrabeng kalibutanong kaguliyang tungod sa pag-apas sa imperyalismong US nga usabon ang kahimtang sa kalibutan, aron subling ituboy ang kaugalingon isip solong superpower. Paspas nga nagkakusog ang maong panagbangi taliwala sa nagapadayong krisis sa kalibutanong sistemang kapitalista. Ginagamit sa US ang kusog-militar niini sa pagtinguha nga maangkon ang lapad nga mga merkado ug mga tinubdan sa mahinungdanong mineral, ug pugngan ang padayon nga paglambo ug paglapad sa gahum sa karibal niining China. Sa laraw sa US, nagkadaku ang hulga sa gubat sa lain-laing bahin sa kalibutan.

Kinahanglan kaayo karon nga pakusgon ang NDF ug ang patriyotikong prente sa katawhang Pilipino aron ipakaylap ang baruganan alang sa nasudnong kagawasan: kagawasan gikan sa langyawng interbensyong militar, kagawasan sa ekonomiya, pulitika ug kultura. Kinahanglang isalikway ug batukan ang neokolonyal nga estado sa mga nagharing hut-ong nga ginagamit sa pagsumpo sa makinasudnong tinguha sa katawhan.

Kinahanglang pakusgon ang NDF pinaagi sa pagpakusog sa mga alyadong organisasyon niining nagkahiusa ug nagtinabangay alang sa pagpaasdang sa gubat sa katawhan. Kinahanglang pakusgon ang kalihukang propaganda aron pukawon ug palagsikon ang diwang patriyotiko sa mga mamumuo ug mag-uuma, kabatan-onang estudyante, masang kabus, kababayen-an, magtutudlo ug empleyado, ug uban pang demokratikong sektor.

Kinahanglang pahugton ug palapdon pa sa NDF ug sa nasudnon-demokratikong kalihukan ang naabot niini sa mga akademiko, tawong-simbahan, mga abugado ug propesyunal, gagmayng negosyante, ug tanang sektor nga angayang hugpungon ilalum sa bandera sa kagawasan. Kinahanglan usab nga pakusgon ang koneksyon sa mga upisyal ug ginsakpan sa reaksyunaryong militar ug pulis nga may sentimyentong patriyotiko, ug aghaton silang mobarog batok sa traydor nga rehimeng Marcos nga ginapagamit ang AFP ug PNP sa imperyalismong US sa pagpanghulhog sa China, ug sa pagpanumpo sa katawhang Pilipino nga nakigbisog alang sa kagawasan.

Kinahanglang palapdon sa NDF ang koneksyon niini sa tanang kalihukan ug organisasyon sa tibuok kalibutan nga babag sa imperyalistang gubat. Kinahanglan kining motabang sa pagtukod og lig-ong dugukan sa lapad nga kalihukang anti-imperyalista ug pahimuslan ang tanang kontradiksyon sa han-ay sa mga imperyalista alang sa kaayuhan sa lapad nga masa sa katawhan.

Ang pinakadakung tahas karon sa NDF mao ang himuon ang tanan alang sa pagpaasdang sa malungtarong gubat sa katawhan, ilabina ang pagpakusog sa BHB ug pagpalagsik balik sa armadong pakigbisog ug rebolusyonaryong kalihukang masa sa kabanikanhan. Ang rebolusyonaryong armadong pakigbisog sa katawhang Pilipino ang nag-una ug pinaka-epektibong porma sa pagsukol aron pugngan ang imperyalistang gubat nga ginaduso sa US, ug aron kab-uton ang nasudnong kagawasan ug demokrasya.