Gidakop sa mga pwersa sa estado ang usa ka pamilya sa Sorsogon, duha ka mag-uuma sa Quezon ug Masbate, ug mga batan-on sa Isabela sa milabayng mga semana. Giakusahan sila sa nagkalain-laing kasong kriminal ug pagkalambigit sa Bagong Hukbong Bayan (BHB).

Niadtong Abril 17, gidakop sa mga pulis ug sa 31st IB si Gilberto Tolentino, 50-anyos nga mag-uuma, ang iyang asawa nga si Amelia, 47, anak nga si Regine, 21, ug ilang 2-anyos nga apo niadtong Abril 17. Gikuha sila sa mga pwersa sa estado sa Barangay San Vicente, Donsol, Sorsogon ug wala pa makita sa mga paryente sa kasamtangan.

Matud sa taho, bugtong si Gilberto ang gustong kuhaon sa mga pwersa sa estado apan mibalibad ang iyang asawa ug mga paryente maong mikuyog silang tanan. Niadtong Abril 18, diha-diha nga miadto ang paryente sa mga Tolentino ug upisyal sa barangay sa istasyon sa pulis sa Donsol ug sa kampo sa militar sa Barangay San Jose aron pangitaon ang mga biktima. Gilimod sa mga pulis ug militar nga anaa sa ilang kustodiya ang pamilya.

Sa Masbate, gidakop sa 2nd IB si Isabel delos Reyes, 56, sibilyang mag-uuma gikan sa Barangay Libertad, Cawayan niadtong Abril 17. Human kini sa engkwentrong nahitabo tali sa 2nd IB ug BHB-Masbate (Jose Rapsing Command) sa maong adlawa sa utlanan sa Barangay Miabas, Palanas ug Barangay Libertad, Cawayan. Gipiktyuran siya nga adunay gunit nga pusil ug gipugos nga maghimo og istorya nga “nangilkil” ang yunit sa BHB sa mga lokal nga kandidato sa eleksyong 2025.

Sa Quezon, gidakop sa militar si Rico Endrinal, mag-uumang residente sa Barangay Sugod, Lopez niadtong Abril 6. Gibalhin-balhin siya og prisohan ug gipalisud-lisud ang pamilya nga maestorya siya. Human ang insidente, nagkampo sa ilang komunidad ang mga sundalo ug walay hunong nga namig-ot sa iyang pamilya.

Sa Isabela, gidakop sa 5th ID si Andy Magno sa Kabataan Party-list ug kauban niyang Agta samtang nangampanya sa Barangay Dicamay Dos, Jones niadtong Abril 20. Si Magno usa ka gradweyt sa University of the Philippines-Manila.