Wala-untat ang pasistang pagpang-atake sang rehimen Narendra Modi sang India batuk sa pumuluyong Adivasi, mga pwersang demokratiko,kag rebolusyonaryong grupo sa ngalan sang Operation Kagaar, yara sa ika-15 ka bulan na ang brutal nga operasyon kontra-insuhensya nga nagkaltas sang kabuhi sang indi magnubo sa 400 ka sibilyan, kadam-an mga Adivasi ukon tumandok nga pumuluyo kag mga rebolusyonaryo.

Sa mga report, 287 ang ginpatay sadtong 2024 kag yara sa 113 na subong nga 2025. Tatlo ka bahin (1/3) sa mga biktima mga tumandok nga Adivasi samtang 40% mga kababaehan. Madamo sa mga kaso sang pagpatay ginpaguwa nga mga “engkwentro” sang armadong pwersa sang reaksyonaryong estado sang India sa People’s Liberation Guerilla Army (PLGA) sang Communist Party of India (Maoist).

Indi luwas ang mga lapsag kag bata sa mahigko nga gyera sang rehimen Modi. Sadtong 2024, 14 ka mga bata edad 14-anyos panubo ang ginpatay, lakip ang isa ka 6-bulan nga lapsag.

Ginsugdan ang Operation Kagaar sadtong Enero 2024 sa Abujhmaad, isa ka bukiron kag lasangon nga rehiyon sa sur sang estado sang Chhattisgarh nga yara sa sentral sang India. Pinakagrabe ang operasyon sa pito ka distrito sang Bastar. Gintarget sini ang mga Adivasi nga nagapakig-away batuk sa pagpasilabot sang mga korporasyon multinasyunal sa ila dutang ginpanubli.

Sa 15 ka bulan, indi magnubo sa 13 ka mga dalagko nga operasyon militar ang ginpatigayon sa Bastar, gamit ang indi magnubo sa 1,000 ka pwersa sa kada operasyon. Ginatos ka mga kaso sang paglapas sa tawhanon nga kinamatarung ang nalista sa panahon nga ini. Tungod sini, ginbansagan ang lugar bilang “Bastar Killing Fields.”

May 300 ka kampo militar sa Bastar kon diin ginatantya nga 50 ang gintukod sa panahon sang Operation Kagaar. Sa sakup sang Abujhmaad, may yara siyam ka kampo militar. Sa kadamuon sang mga ini, may yara kampo sa kada 2-3 kilometro. Ang mga ini ang nagaserbe nga sentro sang operasyon kontra-insurhensya sa mga baw-ing nga lugar. May yara isa ka pwersa sang estado sa kada siyam ka sibilyan sa Bastar.

Agud batikuson ang terorismo sang estado, nagtipon ang mga grupo sa Delhi sa pagpanguna sang Forum Against Corporatization and Militarization (FACAM) sadtong Marso 26. Suno kay Prof. Saroj Giri sang FACAM, mas nagasingki ang pasistang pagpang-atake sang Brahmanical Hindutva pasistang rehimen Modi sa Bastar tungod sa organisadong pakig-away sang mga Adivasi kag mangunguma. Gina-upangan sang ila paghimakas ang pagpangkawkaw sang mga dalagko nga korporasyon sa rehiyon.

Ang mga gyera sa mga Adivasi kag ang Operation Kagaar kabahin sang pangkabug-osan nga pagpasingki sang pasismo sang estado sang India sa idalum sang Surajkund Scheme (2022). Ginapaypayan sini ang panatisismo pangrelihiyon para sa pasistang pagpanumpo. Ginagamit sini nga pangtabon ang “Vision 2047 for Viksit Bharat” agud tukuron ang “Hindu Rashtra” ukon pungsod nga Hindu.

Panawagan para sa kalinong

Sa atubang sang mga pagpang-atake, nagtipon ang mga demokratikong sektor sa Hyderabad, Telengana sadtong ulihi nga semana sang Marso agud ipanawagan sa estado ni Modi nga makighinun-anon sa kalinong sa CPI (Maoist). Pila ka adlaw pagkatapos sini, nagsabat ang CPI (Maoist) kag nagpahayag sang kahandaan nga magsulod sa pakighinun-anon.

Paagi kay kaupod Abhay, tagpamaba sang partido ginhapag sang CPI (Maoist) ang apat ka mga kundisyon para sa negosasyon. Nagtanyag man ang partido sang untat-lupok kon positibo nga magsabat ang rehimen Modi sa panawagan para sa hinun-anon sa kalinong.

Una, ginagiit sini ang pag-untat sang Operation Kagaar nga nagapatay sa mga sibilyan. Ikaduha, ginapa-untat sini ang pagtukod sang mga bag-o nga kampo militar kag magpabilin sa nagaluntad nga kampo ang mga soldado. Ikatatlo, untaton sang estado ang pagpaguwa sang bag-o nga Memorandum of Understanding ukon permit sa mga korporasyon para makapangkawkaw sa kapalibutan. Kag ikaapat, hilwayon ang tanan nga mga bilanggong pulitikal nga gin-aresto tungod sa pakig-away sa korporatisasyon kag militarisasyon.

Ginasuportahan sang lain-lain nga demokratikong organisasyon ang kahandaan sang CPI (Maoist) nga magsulod sa hinun-anon sa kalinong sa nglan sang kaayuhan sang pumuluyong Indian. Apang pareho sang ginasigahum, lubos ini nga ginkontra sang reaksyonaryo nga estado. Siling sini, makig-estorya lamang sila sa partido kon magpahayag ini sang pagsungka.

Sa atubang sini, determinado ang CPI (Maoist) kag PLGA nga ipadayon ang ila armadong paghimakas tubtob indi masabat ang sandigan nga problema sang pumuluyong Indian.