Sa wala pa nagsugod ang Balikatan sa katapusan sa Abril, naghimo na ang Armed Forces of the Philippines (AFP) og mga “clearing operation” sa mga sibilyang komunidad isip pagpangandam sa pag-abot sa mga tropang Amerikano. Sa Central Luzon, gisakop niini ang mga komunidad sa mag-uuma sa sa Aurora, Bulacan ug Nueva Ecija aron hawanan ang dalan alang sa Combined Joint Logistics Over-the-Shore (CJSLOTS) sa US nga gilunsad niadtong Abril 9.

Matud sa taho sa mga residente sa Aurora, midunggo niadto pang Abril 16 ang duha ka barkong gigamit sa CJSLOTS sa Barangay Paltik, Dingalan. Padayon usab ang clearing operations sa AFP, uban ang mga sundalong Amerikano, gikan Barangay Umiray, Dingalan hangtud sa General Tiño sa Nueva Ecija ug Bulacan. Matud nila, lapas usa ka bulan na nga wala sila nakapanginabuhi tungod kay gibawalan sila nga moadto sa ilang mga kaingin ug sa ilang kuhaanan og pagkaon. Nagbunga usab og kahadlok ang mga sundalong Amerikano dihang kalit ra silang misulod sa Sityo Singawan sa Barangay Umiray. Sa Bulacan, nakita sa mga residente nga adunay mga Amerikano sa Camp Tecson sa lungsod sa San Miguel.

Perwisyo ug kaguliyang usab ang dala ngadto sa mga residente sa Casambalangan, Sta. Ana sa Cagayan ang sunud-sunod nga pag-abot sa mga Amerikanong sakyanan ug gamit iggugubat. Natugaw ang ilang komunidad, ilabina tungod sa paglupad sa mga helikopter pang-atake. Gigamit sa mga tropang Amerikano ang Port Irene sa maong lungsod aron inaog ang mga sakyanan nga pagagamiton sa amphibious exercises niini sa Mayo.

Gikabalak-ang mawad-an og panginabuhian ang mga mangingisda tungod sa pagdeklara og “no sail zone” sa mga lungsod duul sa baybay, sama sa gihimo niadtong Balikatan 2024. Ingonman, mabulabog ang panginabuhian sa mga mag-uuma sa mga bukid ug lasang sa aerial exercises. Dugang kini sa paturagas nga pag-utingkad sa mga pwersa sa 5th ID sa bukirong dapit sa prubinsya. Gawas sa disturbo ug pagkaguba sa panginabuhian, grabe ang gibungang kahadlok ug troma sa mga sundalo, ilabina sa mga babaye, bata ug tigulang. Sa paghatud pa lang gani sa mga kahimanan ug pwersa sa kahanginan nabati na sa katawhang Cagayanon ang kabalaka ug kahigwaos, ilabina ang planong live fire exercises sa rehiyon.