Waray-hunong an pasista nga pangatake han rehimen Narenda Modi han India kontra ha katawhan Adivasi, mga pwersa nga demokratiko, ngan rebolusyunaryo nga grupo ha ngaran han Operation Kagaar. Aada na ha ika-15 kabulan an brutal nga kontra-insurhensiya nga operasyon nga nag-utod ha kinabuhi han diri mamenos ha 400 nga sibilyan, kadam-an mga Adivasi o minoriya nga katawhan ngan mga rebolusyunaryo.

Ha mga report, 287 an ginpatay hadton 2024 ngan aada ha 113 na yana nga 2025. Usa-ha-tulo (1/3) ha mga biktima mga minoriya nga Adivasi samtang 40% an kababayin-an. Damo ha mga kaso han panmatay ginpapagawas nga mga “engkwentro” han armado nga pwersa han reaksyunaryo nga estado han India ha People’s Liberation Guerilla Army (PLGA) han Communist Party of India (Maoist).

Diri talwas an mga puya ngan kabataan ha mahugaw nga gerra han rehimen Modi. Hadton 2024, 14 nga mga kabataan nga edad 14-anyos tipaubos an ginpatay, kaupod an usa nga 6-kabulan nga puya.

Gintikangan an Operation Kagaar hadton Enero 2024 ha Abujhmaad, usa nga bubkiron ngan kagugub-an nga rehiyon ha sur han estado han Chhattisgarh nga aada ha sentro han India. Pinakagrabe an operasyon ha pito nga distrito han Bastar. Gintarget hini an mga Adivasi nga naato ha pagsakob han mga multinasyunal nga korporasyon ha ansestral nga katunaan.

Ha 15 kabulan, diri mamenos ha 13 nga dagko nga operasyon militar an ginhimo ha Bastar, gamit an diri mamenos ha 1,000 nga pwersa ha kada operasyon. Gatus-gatos an mga kaso han pagtalapas ha tawhanon nga katungod an nahilista hiton nga panahon. Tungod hini, ginbansagan an lugar komo “Bastar Killing Fields.”

Mayda 300 nga kampo militar ha Bastar diin gintatantiya nga 50 an igintindog ha panahon han Operation Kagaar. Ha lupgop han Abujhmaad, mayda siyam nga kampo militar. Ha kadamo hini, mayda kampo ha kada 2-3 kakilometro. Nagseserbe ini nga sentro han kontra-insurhensiya nga operasyon ha mga tay-aw nga lugar. Mayda usa nga pwersa han estado ha kada siyam nga sibilyan ha Bastar.

Agud suknaon an terorismo han estado, nagtirok an mga grupo ha Delhi ha pangunguna han Forum Against Corporatization and Militarization (FACAM) hadton Marso 26. Sigon kan Prof. Saroj Giri han FACAM, ginpapapintas gud an pasista nga pangatake han Brahmanical Hindutva pasista nga rehimen Modi ha Bastar tungod ha organisado nga pag-ato han mga Adivasi ngan parag-uma. Gin-uulang han ira pakigbisog an pandambong han dagko nga korporasyon ha rehiyon.

An gerra ha mga Adivasi ngan an Operation Kagaar kaparte han kabug-usan nga pagpapagrabe han pasismo han estado han India ilarum han Surajkund Scheme (2022). Ginpapaypayan hini an panrelihiyon nga panatisismo para ha pasista nga panmuypoy. Gin-gagamit hini an tahub han “Vision 2047 for Viksit Bharat” agud magbug-os hin “Hindu Rashtra” o nasud nga Hindu.

Panawagan para ha kamurayawan

Atubangan han mga pag-atake, nagtirok an mga demokratiko nga sektor ha Hyderabad, Telengan hadton urhi nga semana han Marso agud ipanawagan ha estado ni Modi nga makig-erestorya pankamurayawan ha CPI (Maoist). Pira kaadlaw kahuman hini, bumaton an CPI (Maoist) ngan nagpahayag han kaandaman nga sumakob ha erestorya.

Pinaagi kan Kasamang Abhay, tagapagyakan han Partido, iginplastar han CPI (Maoist) an upat nga mga kundisyon para ha negosasyon. Nagproponer liwat an Partido hin ukoy-bubto kun positibo nga mabaton an rehimen Modi ha panawagan para ha erestorya pankamurayawan.

Syahan, igin-iinsister hini an pagpaundang ha Operation Kagaar nga nagpapatay ha mga sibilyan. Ikaduha, iginpapaundang hini an pagtitindog han mga bag-o nga kampo militar ngan magpabilin ha naeksister nga mga kampo an mga sundalo. Ikatulo, undangon han estado an pagpagawas han bag-o nga mga Memorandum of Understanding o permit ha mga korporasyon para makagdambong ha kalibungan. Ngan ikaupat, pagawson an ngatanan nga mga priso pulitikal nga gin-aresto tungod ha pag-ato ha korporatisasyon ngan militarisasyon.

Ginsuportahan han magkalain-lain nga demokratiko nga organisasyon an kaandaman han CPI (Maoist) nga sumakob ha erestorya pankamurayawan ha ngaran han kaupayan han katawhan Indian. Kundi, sugad han ginlalauman, butaray ini nga ginkontra han reaksyunaryo nga estado. Sering hini, makikig-estorya la hira ha Partido kun magpahayag ini han pagsurender.

Atubangan hini, determinado an CPI (Maoist) ngan PLGA nga igpadayon an ira armado nga pakig-away tubtub nga diri nababaton an batakan nga mga problema han katawhan Indian.