Magkasunod nga gipagula sa Sine Proletaryo ug Artista at Manunulat ng Sambayanan (Armas)-Southern Tagalog ang usa ka bag-ong serye ug album niining Abril. Nahisgutan dinhi ang kinabuhi sa mga rebolusyonaryo ug ang ilang madasigong paningkamot aron ipatuman ang kalihukang pagtul-id.

Niadtong Abril 8, gilunsad sa Sine Proletaryo ang pinakabag-ong bidyo serye niini nga “Buhay Gerilya” kung asa ginapakita ang kinabuhi ug pakigbisog sa mga rebolusyonaryong manggugubat ug kumander sa Bagong Hukbong Bayan (BHB) ug mga myembro sa rebolusyonaryong organisasyon. Tumong sa serye nga ipakita ang pagtamod sa rebolusyonaryong mga prinsipyo, mga pagsulay sa rebolusyon, ug adlaw-adlaw nga kasinatian sa pagpanday sa usa ka bag-ong katilingban.

Unang nahinabi sa Sine Proletaryo, sa pakigtinabangay sa Upisina sa Tigpamaba sa Melito Glor Command, mao si Comrade Kathryn, upisyal sa pulitika sa BHB-Southern Tagalog. Giawhag sa Sine Proletaryo ang uban pang mga yunit sa BHB ug mga organisasyong masa nga magpadala sa ilang mga bidyo ug interbyu para sa serye.

Niadtong Abril 11, gipagula sa Armas-ST ang album nga Ampatin (2025) nga gilangkuban sa walo ka awit, usa ka instrumental ug usa ka minus 1. Ang maong album naghulagway sa kasamtangang kalihukang pagtul-id nga ginalunsad sa Partido.

Luyo sa grabeng atake sa estado, napagula ang album sa pagtibangay sa gerilyang produksyon sa sonang gerilya ug lungsod. Ginaawhag sa grupo ang tanan nga ipakaylap ang mga kanta sa album. “Tun-an, ipasundayag, ipatukar sa mga panagtapok ug uban pang susamang aktibidad. Ipakaylap usab ang kopyang digital sa tanang posibleng daluyan,” matud niini.

Mada-download ang bidyo ug album sa website sa PRWC (www.philippinerevolution.nu).