Pagbarog batok sa mina. Sa usa ka porum sa Tabuk City, Kalinga niadtong Abril 12, nagpadayag og pagsupak ang kapin 100 ka lumulupyo batok sa planong pagmina sa Makilala Mining Company Incorporated (MMCI) sa ilang lungsod. Langkubon sa MMCI ang tulo ka lugar sa Pasil, Kalinga—ang Maalinao, Caigutan ug Biyog—nga langkub sa yutang kabilin sa Tribu Balatoc ug mga bahin sa Guinaang. Bag-o lang, gihatagan ang MMCI sa rehimeng Marcos og pondo gikan sa Maharlika Fund aron ipadayon ang maong magun-ubong mga proyekto.

Kalbaryo sa katawhan ang rehimeng Marcos. Naglunsad og “Kalbaryo sa katawhan” duul sa Mendiola ang mga kabus sa kasyudaran sa pagpanguna sa Kadamay niadtong Abril 16. Kuyog sa grupo ang mga pamilya sa mga biktima sa ekstra-hudisyal nga pagpatay ilalum sa milabayng administrasyong Duterte ug mga kabus nga nakasinati og demolisyon sa ilang mga balay, mga kabatan-onan ug mamumuo. Naglunsad og susamang aktibidad sa parehong adlaw ang Kadamay-Negros, mga grupo sa kabus, mangingisda ug mag-uuma sa Bacolod City.

Dagan batok sa pagpangabuso. Naglunsad og “Takbo Babae 2025″ o ang pagdagan batok sa abuso ang Gabriela Women’s Party sulod sa kampus sa University of the Philippines-Diliman niadtong Abril 13. Matud sa GWP, ang ilang aktibidad pagpakita sa baruganan “batok sa kabangis nga nakabase sa kasarian.” Gatusan ang misalmot lakip ang mga iladong personalidad sama sa mga artistang silang Barbie Forteza ug Ryza Cenon, ug Miss Globe runner-up nga si Rowee Lucero.

Itum batok sa taas-singil sa matrikula. Nagprotesta ang mga estudyante ug myembro sa Anakbayan-Adamson University niadtong Abril 11. Nanul-ob sila og itum nga sanina aron hatagag duut ang ilang pagsupak sa planong 5% nga taas-matrikula sa unibersidad alang sa akademikong tuig 2025-2026. Katugbang niini ang dugang nga ₱2,500 sa matrikula. Niadtong 2022 ulahing nagpahamtang og taas-matrikula ang unibersidad nga mikabat og 5.8%.