Nakikig-usa an Partido ngan an Bagong Hukbong Bayan ha tiarabot nga pagsalin-urog han ika-52 nga anibersaryo han National Democratic Front ha Abril 24. Igpasangyaw ngan igselebrar naton an mga nakab-ot ngan kadaugan han NDF ha masobra lima kadekada nga pagbutok ha katawhan Pilipino, ha pag-undong ngan pagtaglawas ha ira nasyunal ngan demokratiko nga mga ungara, ngan pagpasulong han demokratiko nga rebolusyon han katawhan pinaagi han gerra han katawhan.

Diri madidiwara an dako nga kamahinungdanon yana han pagsalin- urog ha adlaw han katukod han NDF. Komo pinakakonsolidado nga parte han nasyunal nga nagkakaurusa nga prente ngan puthaw nga rubas han patriyotiko nga prente han katawhan Pilipino, importante kaupay yana nga matadong ngan madig-on nga tumindog an NDF. Ini ha atubangan han natikagrabe nga panginginlabot ngan nagtitikahugot nga kontrol han imperyalismo nga US ha militar, pulitika, ekonomiya ngan kultura han nasud, ha butnga han ginpapapintas hini nga sumpakiay ha imperyalista nga karibal nga China. Dara hini an waray kapareho nga destroso, pag-inantos ngan hulga ha katalwasan, kalibrihan ngan dignidad han katawhan Pilipino.

Kinahanglan bug-uson han NDF an hilapad nga pagkaurusa han katawhan kontra ha waray-pulos nga “deterrence policy” o palisiya han pagpakita han makusog nga pwersa militar han US agud kuno pugngan nga umatake an China. Ilarum hini nga palisiya, gin-gagamit han militar han US an Balikatan ngan wala-tuo nga mga war games, agud ipusisyon an mga armas ngan tawuhan hini ha magkalain-lain nga parte han nasud. Katuyuanan hini, diri nga pugngan nga umatake an China, kundi an hadlukon ngan sulsulan ini.

Sentro yana han pokus han US an Batanes diin igindedeploy an natikadamo nga misayl hini nga nakapuntirya ha China. Kada adlaw liwat an paggawas-sulod han mga higante nga bokis-de-gerra han US ha magkalain-lain nga parte han Pilipinas nga nagkakayer han tikadamo nga barko han China ha South China Sea ngan exclusive economic zone han Pilipinas. Ginbubutong han US ha Pilipinas an mga armado nga pwersa han Japan, Australia, France ngan iba pa nga alyado nga imperyalista nga nasud.

Todo-todo an pagyinukbo han niyutiyo nga rehimen Marcos ha dikta han US. Iginpapagamit hini ha US an AFP agud magserbe nga kabulig han mga pwersa militar han US. Todo-larga nga gin-gagamit han US an Pilipinas komo proxy ha ginhihimo hini nga pagsulsol ha China. Nagpapagamit ha US an traydor nga hi Marcos ha pag-aghat ngan pagbulang ha China, imbes nga igtaglawas an interes han mga Pilipino nga makabug-os han makisasangkayon ngan mamurayaw nga sumpayan ha kasapit nga nasud nga China.

Kinahanglan nga manguna an NDF ha pagpakusog han pagtipa han katawhan ha langyaw nga pandambong ngan paghahadi ha ekonomiya. Kinahanglan magserbe ini nga makusog nga tingog han pagtipa ha paggamit han gubyerno nga Trump ha hulga han mga taripa kontra ha mga produkto nga gin-iimport tikang ha Pilipinas, agud dugang nga abrihan an nasud ha pagtinambak dinhi han mga sobra nga epektos han US.

Kinahanglan makusog nga suknaon han NDF an rehimen Marcos ha mga neoliberal nga pan-ekonomiya nga palisiya nga naghahatag ha mga langyaw nga dagko nga kapitalista ngan kasosyo hini nga dagko nga negosyo han dugang nga poder nga manlupot han tuna, huthuton an natural nga karikuhan han nasud, rub-on an kalibungan ngan iludlod an nasud ha utang. Kinahanglan hini sukton an imperyalismo nga US ngan neokolonyal nga estado ha pagpapabilin nga atrasado an ekonomiya ngan lokal nga produksyon, ngan pagpapakuri ha masa han katawhan.

Waray hunong yana an saywar ngan pankultura nga kontrol han imperyalismo nga US para ha manipulasyon ha hunahuna ngan kapukawan han katawhan Pilipino. Gamit an midya ngan social media, ginpapagawas nira nga hira “sangkay, kabakyang ngan alyado” han katawhan Pilipino, ngan gintatahuban an waray-wantas nga pagtamak ha paglulugaring han nasud. Kakunsabo an rehimen Marcos, ginsusung-an han US an Sinophobia o sentimyento nga kontra-China, ngan pauru-utro an pagtratar ha nasud komo “pangontra” o “hulga.”

Ini ngatanan kaparte han nagtitikagrabe nga pankalibutan nga kontradiksyon bunga han paglinanat han imperyalismo nga US nga bag- uhon an kaayusan han kalibutan, agud utro nga ibutang an kalugaringon komo solo nga superpower. Madagmit nga nagtitikapaso ini nga kontradiksyon ha butnga han nagpapadayon nga krisis han pankalibutan nga sistema nga kapitalista. Gin-gagamit han US an kusog-militar hini ha paghingyap nga maangkon an higluag nga merkado han mga surok han importante nga mineral, ngan pugngan an padayon nga pagrabong ngan paghiluag han poder han karibal hini nga China. Ha paglinanat han US, natikadako an hulga han gerra ha magkalain-lain nga dapit han kalibutan.

Kinahanglan gud yana nga pakusgon an NDF ngan an patriyotiko nga prente han katawhan Pilipino agud ipasamwak an panindugan para ha nasyunal nga katalwasan: katalwasan tikang ha langyaw nga panginginlabot militar, katalwasan nga pan-ekonomiya, pampulitika, ngan pankultura. Kinahanglan isalikway ngan atuhan an neokolonyal nga estado han mga naghahadi nga klase nga gin-gagamit ha pagpuypoy ha nasyunal nga hingyap han katawhan.

Kinahanglan pakusgon an NDF pinaagi han pagpakusog han mga alyado nga organisasyon hini nga nagkakaurusa ngan nagbubuligay para ha pagpasulong han gerra han katawhan. Kinahanglan pakusgon an kagiusan nga propaganda agud pukawon ngan paglarabon an patriyotiko nga diwa han mga trabahador ngan parag-uma, kabatan-unan nga estudyante, masa nga kablas, kababayin-an, magturutdo ngan empleyado, ngan iba pa nga demokratiko nga sektor.

Kinahanglan pahugton ngan pahiluagon pa han NDF ngan han nasyunal-demokratiko nga kagiusan an naaabot hini ha mga akademiko, tawo ha singbahan, mga abugado ngan propesyunal, gudti nga negosyante, ngan ngatanan nga sektor nga kinahanglan butukon ha ilarum han bandera han katalwasan. Kinahanglan gihap pakusgon an sumpayan ha mga upisyal ngan tawuhan han reaksyunaryo nga militar ngan pulis nga may patriyotiko nga sentimyento, ngan aghaton hira nga tumindog kontra ha rehimen Marcos nga iginpapagamit an AFP ngan PNP ha imperyalismo nga US ha pagsulsol ha China, ngan ha panmuypoy ha katawhan Pilipino nga nakikigbisog para ha katalwasan.

Kinahanglan pahiluagon han NDF an sumpayan hini ha ngatanan nga kagiusan ngan organisasyon ha bug-os nga kalibutan nga natipa ha imperyalista nga gerra. Kinahanglan ini bumulig ha pagbubug-os han madig-on nga butagtok han hiluag nga kagiusan nga kontra-imperyalista ngan singabuton an ngatanan nga kontradiksyon ha ranggo han mga imperyalista para ha kapulsanan han hiluag nga masa han katawhan.

An pinakadako nga responsabilidad yana han NDF amo an himuon an ngatanan para ha pagpapasulong han panmaihaan nga gerra han katawhan, labina an pagpapakusog han BHB ngan pagpapanibag-o nga rayhak han armado nga pakig-away ngan rebolusyunaryo nga kagiusan masa ha kabaryuhan. An rebolusyunaryo nga armado nga pakig-away han katawhan Pilipino an prinsipal ngan pinaka- epektibo nga porma han pag-ato agud ulangon an imperyalista nga gerra nga gin-aaghat han US, ngan agud kab-uton an nasyunal nga katalwasan ngan demokrasya.