Antes pa mag-abre an Balikatan ha katapusan han Abril, naghimo na an Armed Forces of the Philippines (AFP) hin mga “clearing operation” ha mga sibilyan nga komunidad komo pangandam ha pag-abot han mga tropa nga Amerikano. Ha Central Luzon, ginlupgop hini an mga komunidad han parag-uma ha Aurora, Bulacan ngan Nueva Ecija agud tagan-wada an Combined Joint Logistics Over-the-Shore (CJSLOTS) han US nga ginhimo hadton Abril 9.

Sigon ha report han mga residente ha Aurora, tikang pa hadton Abril 16 nakaduong an duha nga barko nga gin-gamit ha CJSLOTS ha Barangay Paltik, Dingalan. Padayon liwat an clearing operations han AFP, kaupod an mga sundalo nga Amerikano, tikang Barangay Umiray, Dingalan tubtub ha General Tinio ha Nueva Ecija ngan Bulacan. Sering nira, lahos usa kabulan na nga diri hira makagpakabuhi tungod kay gindid-an hira nga kumadto ha ira mga kaingin ngan lugar nga surok han pagkaon. Nagdurot naman hin kabaraka an mga sundalo nga Amerikano han tigda hira nga sumakob ha Sityo Singawan ha Barangay Umiray. Ha Bulacan, nakit-an han mga residente nga mayda mga Amerikano ha Camp Tecson ha bungto han San Miguel.

Perwisyo ngan karinggal liwat an dara ha mga residente han Casambalangan, Sta. Ana ha Cagayan han susrunod na an pag-abot han mga Amerikano nga sarakyan ngan higamit pan- gerra. Nadistorbo an ira komunidad, labina ha paglupad han mga pan-atake nga helikopter. Gin-gamit han mga tropa nga Amerikano an Port Irene ha nasering nga bungto agud pahugdon an mga sarakyan nga gagamiton ha amphibious exercises hini ha Mayo.

Nanenelikado nga mawarayan hin pakabuhi an mga parupangisda durot han pagdedeklara han “no sail zone” (“sona nga igindidiri an pagpalawod”) ha mga bungto hirani ha baybayon, sugad han ginhimo hadto nga Balikatan 2024. Sugadman, mariringgal an pakabuhi han mga parag-uma ha mga bukid ngan guba ha aerial exercises. Dugang ini ha waray hunong nga pagsulay-sukay han mga pwersa han 5th ID ha bubkiron nga parte han prubinsya. Labot ha kalibang ngan kahibang han pakabuhi, grabe an igdudurot nga kahadlok ngan troma han mga sundalo, labina ha mga kababayin-an, kabataan ngan kaarugan. Ha pagdul-ong pala han mga higamit ngan pwersa ha kahanginan ginpuputos na han kabaraka ngan kulba an katawhan nga Cagayanon, dugang pa an ginlalarang nga hihimuon nga live fire exercises ha rehiyon.