Magkasunod nga igin-gawas han Sine Proletaryo ngan Artista at Manunulat ng Sambayanan (Armas)-Southern Tagalog an usa nga bag-o nga serye ngan album hadin Abril. Gintalakay hini an kinabuhi han mga rebolusyunaryo ngan ira pursigido nga panalinguha agud ig-undong an kagiusan nga pagtutul-id.

Hadton Abril 8, iginlansar han Sine Proletaryo an pinakabag-o nga bidyo serye hini nga “Buhay Gerilya” diin iginpasil-ing an kinabuhi ngan pakigbisog han mga rebolusyunaryo nga mangaraway ngan kumander han Bagong Hukbong Bayan (BHB) ngan mga membro han rebolusyunaryo nga organisasyon. Katuyuanan han serye nga igpakita an pagsunod ha rebolusyunaryo nga mga prinsipyo, mga ayat ha rebolusyon, ngan matag-adlaw nga eksperyensya ha pagpapanday han usa nga bag-o nga katilingban.

Syahan nga gin-interbyu han Sine Proletaryo, ha pakikipagbuligay ha Upisina han Tagapagyakan han Melito Glor Command, hi Comrade Kathryn, upisyal ha pulitika han BHB- Southern Tagalog. Gin-aghat han Sine Proletaryo an iba pa nga mga yunit han BHB ngan mga organisasyon masa nga magpadara han ira mga bidyo ngan interbyu nga palalandawon ha serye.

Hadton Abril 11, igin-gawas han Armas-ST an album nga Ampatin (2025) nga nagpalandaw ha walo nga kanta, usa nga instrumental ngan usa nga minus 1. An mga pyesa dinhi nag-eespiho ha inspirasyon nga dara han presente nga kagiusan nga pagtutul-id nga iginlalansar han Partido.

Ha luyo han grabe nga atake han estado, nahipagawas an album ha pagbuligay han ginerilya nga produksyon ha sona nga gerilya ngan syudad. Gin-aghat han grupo an ngatanan nga igpasamwak an mga kanta ha album. “Adman, igpasangyaw, ipatokar ha mga katitirok ngan iba pa nga kapareho nga aktibidad. Ipasamwak gihap an digital nga kopya ha ngatanan han posible nga aragian,” sering hini.

Mada-download an bidyo ngan album ha website han PRWC (www.philippinerevolution.nu).