Gindakop han mga pwersa han estado an usa nga pamilya ha Sorsogon, duha nga parag-uma ha Quezon ngan Masbate, ngan mga kabatan-unan ha Isabela ha naglabay nga mga semana. Gin-akusaran hira han magkalain-lain nga kaso nga kriminal ngan pagkadabi ha Bagong Hukbong Bayan (BHB).

Hadton Abril 17, gindakop han mga pulis ngan han 31st IB hi Gilberto Tolentino, 50 anyos nga parag-uma, an iya asawa nga hi Amelia, 47, anak nga hi Regine, 21, ngan an ira 2-anyos nga apo hadton Abril 17. Ginkuha hira han mga pwersa han estado ha Barangay San Vicente, Donsol, Sorsogon ngan ha presente diri masulsog han mga kaurupdan.

Sigon ha report, hi Gilberto gud la an karuyag kuhaon han mga pwersa han estado kundi diniri an iya asawa ngan mga kaurupdan sanglit inupod hira ngatanan. Hadton Abril 18, kinadto ha gilayon an mga kaurupdan han mga Tolentino ngan upisyal han barangay ha istasyon han pulis ha Donsol ngan ha kampo han militar ha Barangay San Jose agud sulsugon an mga biktima. Igindiwara han mga pulis ngan militar nga aada ha ira kustodiya an pamilya.

Ha Masbate, gindakop han 2nd IB hi Isabel delos Reyes, 56, sibilyan nga parag-uma tikang ha Barangay Libertad, Cawayan hadton Abril 17. Kasunod ini han engkwentro nga nahitabo giutan han 2nd IB ngan BHB-Masbate (Jose Rapsing Command) hiton nga adlaw ha bawnderi han Barangay Miabas, Palanas ngan Barangay Libertad, Cawayan. Ginkuhaan hiya han litrato nga may katin nga pusil ngan ginpirit nga maghimo han istorya nga “nan-ngingilkil” an yunit han BHB ha mga lokal nga kandidato ha eleksyon 2025.

Ha Quezon, gindakop han militar hi Rico Endrinal, parag-uma nga residente han Barangay Sugod, Lopez hadton Abril 6. Ginbarubalhin hiya han prisuhan ngan ginpakurian an pamilya nga makaestorya hiya. Kahuman han panhitabo, nagkampo ha ira komunidad an mga sundalo ngan waray hunong an pan-gigipit ha iya pamilya.

Ha Isabela, gindakop han 5th ID hi Andy Magno han Kabataan Party-list ngan kaupod niya nga Agta samtang nangangampanya ha Barangay Dicamay Dos, Jones hadton Abril 20. Gradweyt hi Magno han University of the Philippines-Manila.