Nagkakadwa dagiti grupo iti karbengan-tao ken kapamilya dagiti rebolusyonaryo a martir idi Abril 12 iti Bantayog ng mga Bayani idiay Quezon City tapno padayawan ti kinabanwar ken panagibuwis ti biag dagiti rebolusyonaryo para iti nailyan-demokratiko a tarigagay ti umili. Inyuna ti Hustisya! (Pagkakaisa ng mga Biktima para sa Hustisya) ti aktibidad nga addaan tema a “Kinabanwar ken Panaglaban: Pammadayaw para kadagiti Pinapatay a Hors de Combat ken Rebolusyonaryo a Martir.”

Napadayawan iti taripnong dagiti napasag a lider ti Communist Party of the Philippines (CPP), dagiti Nalabbaga a kumander ken mannakigubat ti New People’s Army (NPA), dagiti upisyal ti National Democratic Front of the Philippines (NDFP), ken nagpanawagan da ti hustisya para kadagiti hors de combat a mannakigubat ti NPA a pinapatay ti Armed Forces of the Philippines.

Segun iti Hustisya, nagbalin met daytoy nga okasyon tapno balbaliw a pasingkedan ti panangitandudo iti karbengan ti umili iti bukod a pangngeddeng ken panangtalmeg a ti armado a panagrukwas ti umili ket nainkalintegan.