Sakbay pay nga aglukat ti Balikatan iti agtapos ti Abril, nagiyaramiden ti Armed Forces of the Philippines (AFP) kadagiti “clearing operation” kadagiti sibilyan a komunidad kas panagsagana iti isasangpet dagiti tropa nga Amerikano. Iti Central Luzon, sinaklaw daytoy dagiti komunidad ti mannalon idiay Aurora, Bulacan ken Nueva Ecija tapno wayaan ti Combined Joint Logistics Over-the-Shore (CJSLOTS) ti US a napasamak idi Abril 9.

Segun iti ulat dagiti residente idiay Aurora, nakasanglad manipud pay Abril 15 ti dua a barko a naaramat iti CJSLOTS iti Barangay Paltik, Dingalan. Agtultuloy met dagiti clearing operations ti AFP, kadwa da dagiti soldado nga Amerikano, manipud Barangay Umiray, Dingalan agingga iti General Tiño idiay Nueva Ecija ken Bulacan. Kunada, nasurok makabulanen a saanda a makapagtrabaho gapu ta maparparitan da a mapan kadagiti uma ken lugar a pangalaanda ti taraon. Nangitunda met ti danag dagiti soldado nga Amerikano idi kellaat a simrek da iti Sityo Singawan idiay Barangay Umiray. Idiay Bulacan, napansin dagiti residente nga adda dagiti Amerikano idiay Camp Tecson iti ili ti San Miguel.

Perwisyo ken riribuk met ti ipapaay kadagiti residente ti Casambalangan, Sta. Ana idiay Cagayan ti agsasaruno a panagsangpet dagiti Amerikano a lugan ken ramit panggubat. Nadistorbo ti komunidad da, nangruna iti panagtayab dagiti pang-atake a helikopter. Inaramat dagiti tropa nga Amerikano ti Port Irene iti nasao nga ili tapno idissaag dagiti lugan a maaramat iti amphibious exercises da inton Mayo.

Agpegpeggad a maawanan ti pagbiagan dagiti mangngalap gapu ti panagideklara ti “no sail zone” kadagiti ili asideg kadagiti baybay, kas ti naaramid idi Balikatan 2024. Kasta met a mabulabog ti pagbiagan dagiti mannalon kadagiti bantay ken bakir iti aerial exercises. Nayon dagitoy iti awan-sarday a clearing operations dagiti pwersa ti 5th ID iti nababantay a paset ti prubinsya. Malaksid iti pannakaitantan ken pannakaperdi ti pagbiagan da, nakaro a buteng ken troma ti itunda dagiti soldado, nangruna kadagiti babbai, ubbing ken natataengan. Iti pay laeng panangitulod kadagiti ramit ken pwersa iti tangatang ket balbakutenen ti amak ti umili a Cagayano nangrunan ti maplanplano nga iyaramid a live fire exercises iti rehiyon.