Panagtakder laban iti panagminas. Iti maysa a porum idiay Tabuk City, Kalinga idi Abril 12, nagipeksa ti panagkedked ti nasurok 100 nga umili laban iti maaramid a panagminas ti Makilala Mining Company Incorporated (MMCI) iti ili da. Sakupen ti MMCI ti tallo a lugar iti Pasil, Kalinga—ti Maalinao, Caigutan ken Biyog—a sakupen ti ansestral a daga ti Tribu Balatoc ken dagiti paset ti Guinaang. Itay nabiit, ti MMCI ket inikkan ti rehimen Marcos ti pondo manipud iti Maharlika Fund tapno ituloy dagiti makaperdi a proyekto daytoy.

Kalbaryo ti umili ti rehimen Marcos. Nagisayangkat ti tignay asideg iti Mendiola dagiti nakurapay iti syudad iti panangiyuna ti Kadamay nga inawagan daytoy a “Kalbaryo ti Umili” idi Abril 16. Kadwa ti grupo dagiti pamilya dagiti biktima ti ekstra-hudisyal a pammapatay iti sidong ti napalabas nga administrasyon Duterte ken dagiti nakurapay a nakapadas ti demolisyon kadagiti pagtaengan da, dagiti agtutubo ken mangmangged. Nagisayangkat ti kapada a tignay iti kapada nga aldaw ti Kadamay-Negros, dagiti grupo ti nakurapay, mangngalap ken mannalon idiay Bacolod City.

Taray laban iti panagabuso. Nagisayangkat ti “Takbo Babae 2025” wenno panagtaray laban iti abuso ti Gabriela Women’s Party iti uneg ti kampus ti University of the Philippines-Diliman idi Abril 13. Segun iti GWP, ti tignay da ket panangipakita ti takder “laban iti kinaranggas a nakabasar iti kasarian.” Ginasut ti nakipaset karaman dagiti mabigbig a personalidad kas kadagiti artista a da Barbie Forteza ken Ryza Cenon, ken Miss Globe runner-up a ni Rowee Lucero.

Nangisit laban iti panagngato iti singir iti matrikula. Nagisayangkat ti tignay-protesta dagiti estudyante ken kameng ti Anakbayan-Adamson University idi Abril 11. Nagisuot da kadagiti kawes a nangisit tapno talmegan ti panagsupyat da iti plano a 5% a panagngato ti matrikula iti unibersidad para iti akademiko a tawen 2025-2026. Kabatog daytoy ti nayon a ₱2,500 iti matrikula. Idi 2022 a maudi a nagipataw ti panagngto iti matrikula ti unibersidad a dimmanon iti 5.8%.