Agsaruno nga inruar ti Sine Proletaryo ken Artista at Manunulat ng Sambayanan (Armas)-Southern Tagalog ti maysa a baro a serye ken album daytoy Abril. Tinalantan kadagitoy ti biag dagiti rebolusyonaryo ken ti kinapinget da iti panangisakad ti tignay panagilinteg.

Idi Abril 8, insayangkat ti Sine Proletaryo ti kabarwan a bidyo serye daytoy a “Buhay Gerilya” nu sadinno a maipaspasirip ti biag ken dangadang dagiti rebolusyonaryo a mannakigubat ken kumander ti New People’s Army (NPA) ken dagiti kameng ti rebolusyonaryo nga organisasyon. Panggep ti serye nga ipakita ti panagtungpal kadagiti rebolusyonaryo a prinsipyo, dagiti pagsubok iti rebolusyon ken inaldaw-aldaw a kapadasan iti panangpanday ti maysa a baro a gimong.

Umuna a kinainnuman ti Sine Proletaryo, iti pannakitinnulong iti Upisina ti Tagapagsarita ti Melito Glor Command, ni Comrade Kathryn, upisyal iti pulitika ti NPA-Southern Tagalog. Inallukoy ti Sine Proletaryo ti dadduma pay a yunit ti NPA ken dagiti organisasyon ti masa nga agipatulod kadagiti bidyo ken interbyu da a maitampok iti serye.

Idi Abril 11, inruar ti Armas-ST ti album nga Ampatin (2025) a nagitampok iti walo a kanta, maysa nga instrumental ken maysa a minus 1. Dagiti pyesa ditoy ket sumarsarming iti inspirasyon nga ituntunda ti agdama a tignay panagilinteg nga isaysayangkat ti Partido.

Iti laksid ti nainget nga atake ti estado, nairuar ti album iti panagtinnulong ti gerilya a produksyon iti sona a gerilya ken syudad. Ginuyugoy ti grupo ti amin nga ipasaknap dagiti kankanta iti album. “Adalen, itag-ay, patokaren kadagiti taripnong ken dadduma pay a kapada nga aktibidad. Ipasaknap met dagiti kopya a digital iti amin a posible a pagayusan,” kuna daytoy.

Ma-download ti bidyo ken album iti website ti PRWC (www.philippinerevolution.nu).