Tiniliw dagiti pwersa ti estado ti maysa a pamilya idiay Sorsogon, dua a mannalon idiay Quezon ken Masbate, ken dagiti agtutubo idiay Isabela iti napalabas a lawlawas. Mapabpabasol da iti nadumaduma a kaso a kriminal ken pannakairaman iti New People’s Army (NPA).

Idi Abril 17, tiniliw dagiti pulis ken ti 31st IB ni Gilberto Tolentino, agtawen 50 a mannalon, ti asawa na a ni Amelia, 47, ti anak da a ni Regine, 21, ken ti agtawen ti dua nga apo da idi Abril 17. Innala isuda dagiti pwersa iti estado idiay Barangay San Vicente, Donsol, Sorsogon ken iti agdama ket saan a matunton dagiti kakabagyan da.

Segun iti ulat, ni laeng Gilberto ti kayat nga alaen dagiti pwersa ti estado ngem nagkedked ti asawa ken kapamilya na isu nga simmurot da amin. Idi Abril 18, dagus a napan dagiti kabagyan dagiti Tolentino ken upisyal ti barangay iti istasyon ti pulis iti Donsol ken iti kampo ti militar iti Barangay San Jose tapno tuntonen dagiti biktima. Inlibak dagiti pulis ken militar nga adda iti kustodiya da ti pamilya.

Idiay Masbate, kinemmeg ti 2nd IB ni Isabel delos Reyes, 56, sibilyan a mannalon manipud iti Barangay Libertad, Cawayan idi Abril 17. Kasaruno daytoy ti engkwentro a napasamak iti baet ti 2nd IB ken NPA-Masbate (Jose Rapsing Command) idiay nga aldaw iti nagbebeddengan dagiti barangay ti Miabas, Palanas ken Libertad iti Cawayan. Inalaan isuna ti litrato a nakaiggem ti paltog ken pinilit da nga agaramid ti istorya nga “agkikkikil” ti yunit ti NPA kadagiti lokal a kandidato iti eleksyon 2025.

Idiay Quezon, kinemmeg ti militar ni Rico Endrinal, mannalon a residente ti Barangay Sugod, Lopez idi Abril 6. Inyakar-akar da isuna iti pagbaludan ken pinarigat da ti pamilya na a makasarita isuna. Kalpasan ti insidente, nagkampo iti komunidad da dagiti soldado ken saan nga agsardeng ti panangliplipit da iti pamilya na.

Idiay Isabela, kinemmeg ti 5th ID ni Andy Magno ti Kabataan Party-list ken ti kadwa na nga Agta bayat nga agkamkampanya da idiay Barangay Dicamay Dos, Jones idi Abril 20. Ni Magno ket nagturpos idiay University of the Philippines-Manila.