Makikaykaysa ti Partido ken New People’s Army (NPA) iti umadani a panangrambak iti maika-52 anibersaryo ti National Democratic Front inton Abril 24. Itag-ay ken rambakan tayo dagiti nagun-od a balligi ti NDF iti nasurok lima a dekada a panangpagkaykaysa iti umili a Pilipino, iti panangitandudo iti panangibagi iti nailyan ken demokratiko a tarigagay da ken panangiyabante iti demokratiko a rebolusyon ti umili babaen ti gubat ti umili.

Kapapatgan tatta ti pananglagip iti aldaw ti pannakabuangay ti NDF. Kas pinakakonsolidado a paset ti nailyan a nagkaykaysa a prente ken landok a bugas ti patriyotiko a prente ti umili a Pilipino, nakapatpateg tatta a nalinteg ken natibker a tumakder ti NDF. Daytoy ket iti sango ti kumarkaro nga interbensyon ken umir-irot a kontrol ti imperyalismo a US iti militar, pulitika, ekonomya ken kultura ti pagilyan, iti tengnga ti pakpakarwen daytoy a susik iti imperyalista a karibal na a China. Ituntunda daytoy ti awan-kapada a panagdadael, panagsagaba ken pangta iti wayawaya, kinatalged ken dignidad ti umili a Pilipino.

Rumbeng a buklen ti NDF ti nalapad a panagkaykaysa ti umili laban iti eppes a “deterrence policy” wenno patakaran ti panangipakita ti napigsa a pwersa a militar ti US tapno kano lapdan nga umatake ti China. Iti sidong daytoy a patakaran, us-usaren ti militar ti US ti Balikatan iti agsusumbangir a war games, tapno ipwesto dagiti armas ken tauhan daytoy iti nadumaduma a paset ti pagilyan. Panggep daytoy a kigtoten ken probokaren ti China, saan a tapno lapdan nga umatake daytoy.

Sentro tatta ti pokus ti US ti Batanes nu sadinno a maipakpakat ti umad-ado a misayl na a nakatutok iti China. Inaldaw met ti panagserrek-ruar dagiti higante a barko a panggubat ti US iti nadumaduma a paset ti Pilipinas a mangguyguyugoy ti umad-ado a barko ti China iti South China Sea ken exclusive economic zone ti Pilipinas. Guyguyoden ti US ditoy Pilipinas dagiti armado a pwersa ti Japan, Australia, France ken dadduma pay nga alyado na nga imperyalista a pagilyan.

Todo-todo ti panagrukrukma ti aso-aso a rehimen Marcos iti diktar ti US. Ipapaaramat daytoy iti US ti AFP tapno agserbi nga alalay ti rehimen Marcos iti diktar ti US. Todo-larga nga ar-aramaten ti US ti Pilipinas kas proxy iti ar-aramiden daytoy a panangprobprobokar iti China. Agpapausar ti traydor a ni Marcos iti US iti panangduklos ken panangseppeg daytoy iti China, imbes nga ibagi ti interes dagiti Pilipino a makabukel ti mannakigayyem ken natalinaay a pannakisilpo iti kaasideg a pagilyan a China.

Rumbeng nga iyuna ti NDF ti panangpapigsa iti panagsupyat ti umili iti gangannaet a panaggamrud ken panagari iti ekonomya. Kasapulan nga agserbi a napigsa a boses daytoy ti panagsupyat iti panagaramat ti gubyerno a Trump iti pangta dagiti taripa laban kadagiti produkto nga maang-angkat manipud iti Pilipinas, tapno ad-adda a luktan ti pagilyan iti panangigabsuon ditoy kadagiti sobra a tagilako ti US.

Nasken a napigsa a batikusen ti NDF ti rehimen Marcos kadagiti neoliberal a patakaran iti ekonomya a mangmangted kadagiti gangannaet a dadakkel a kapitalista ken kasosyo daytoy a dadakkel a negosyo ti nalablabes a bileg nga agkamkam ti daga, ibusen ti natural a kinabaknang ti pagilyan, dadaelen ti aglawlaw ken ilemmes ti pagilyan iti utang. Rumbeng a singiren daytoy ti imperyalismo a US ken neokolonyal nga estado iti panangpatalinaed nga atrasado ti ekonomya ken lokal a produksyon ken panangparigat iti masa ti umili.

Awan-sarday tatta ti saywar ken pangkultura a kontrol ti imperyalismo a US para iti manipulasyon iti kapanunotan ti umili a Pilipino. Usar ti midya ken social media, pagparparangen da nga isuda ket “gayyem, kabinnadang ken alyado” ti umili a Pilipino, ken kalkaluban da ti nadangkok a panangrabngis iti panagwawayas ti pagilyan. Kasabwat ti rehimen Marcos, rubrubroban ti US ti Sinophobia wenno sentimyento a kontra-China, ken ulit-uliten daytoy ti panangibilang iti pagilyan kas “kalaban” wenno “pangta.”

Amin dagitoy ket paset ti kumarkaro a sangalubongan a binnusor a bunga ti panagkamkamat ti imperyalismo a US a baliwan ti urnos ti lubong, tapno ipatugaw ti bagbagi na a kas agmaymaysa a superpower. Napaspas a bumarbara daytoy a risiris iti tengnga ti agtultuloy a krisis ti sangalubongan a sistema a kapitalista. Ar-aramaten ti US ti bileg-militar daytoy iti panagtarigagay a matagikua na ti nalalawa a pagtagilakuan ken dagiti pagtataudan ti napapateg a mineral, ken pawilan ti agtultuloy a panagdakkel ken panaglawa ti bileg ti karibal daytoy a China. Iti panagkamkamat ti US, dumakdakkel ti pangta ti gubat iti nadumaduma a paset ti lubong.

Kasapulan la unay tatta a papigsaen ti NDF ken ti patriyotiko a prente ti umili a Pilipino tapno pasaknapen ti takder para iti nailyan a wayawaya: wayawaya manipud iti gangannaet nga interbensyon militar, wayawaya iti ekonomya, iti pulitika ken iti kultura. Nasken a laksiden ken labanan ti neokolonyal nga estado dagiti agar-ari a dasig a maar-aramat iti panangbekkel iti patriyotiko a tarigagay ti umili.

Rumbeng a papigsaen ti NDF babaen ti panangpapigsa kadagiti alyado nga organisasyon daytoy tapno agkaykaysa ken agtitinnulong para iti panangiyabante iti gubat ti umili. Kasapulan a papigsaen ti tignay propaganda tapno riingen ken pagil-ayaben ti patriyotiko a pakinakem dagiti mangmangged ken mannalon, kabataan-estudyante, masa a nakurapay, babbai, manursuro, empleyado ken dadduma pay a demokratiko a sektor.

Kasapulan a pairuten ken palawaen pay ti NDF ken nailyan-demokratiko a tignay ti madanon daytoy iti intar dagiti akademiko, tao’t simbaan, dagiti abugado ken propesyunal, babassit a negosyante ken amin a sektor a rumbeng a reppeten iti salinong ti bandera ti wayawaya. Nasken met a papigsaen ti pannakisilpo kadagiti upisyal ken tauhan ti reaksyunaryo a militar ken pulis nga addaan sentimyento a patriyotiko, ken awisen isuda a tumakder laban iti traydor a rehimen Marcos a mangipapausar iti AFP ken PNP iti imperyalismo a US iti panangprobokar iti China, ken iti panangikuspil iti umili a Pilipino a makidangdangadang para iti wayawaya.

Rumbeng a palawaen ti NDF ti pannakisilpo daytoy iti amin a tignay ken organisasyon iti intero a lubong a sumupsupyat iti imperyalista a gera. Kasapulan a tumulong daytoy iti panangbukel ti natibker a bugas ti nalawa nga anti-imperyalista a tignay ken gundawayan ti amin a kontradiksyon iti intar dagiti imperyalista para iti pagsayaatan ti nalawa a masa ti umili.

Ti kadakkelan a rebbengen tatta ti NDF ket ti panangaramid ti amin para iti panangiyabante ti naunday a gubat ti umili, nangruna ti panangpapigsa ti NPA ken balbaliw a panangparegta ti armado a dangadang ken rebolusyonaryo a tignay masa iti kaaw-awayan. Ti rebolusyonaryo nga armado a dangadang ti umili a Pilipino ti kangrunaan ken kasamayan a langa ti panaglaban tapno lapdan ti imperyalista a gera a parparnuayen ti US, ken tapno gun-oden ti nailyan a wayawaya ken demokrasya.