Iti Araw ng Kagitingan idi Abril 9, nagprotesta iti asideg ti embahada ti US idiay Manila dagiti grupo a nailyan-demokratiko. Linagip da ti panaglaban ti umili a Pilipino iti gangannaet nga interbensyon militar ken panangsalaknib iti pudno a wayawaya ti Pilipinas. Kinundenar da ti managprobokar a war games ti US, permanente a panagbase ti tropa daytoy iti Pilipinas ken umir-irteng a pannakibiang daytoy iti pagilyan.

Iti agdama, agkaraiwara ti nakaad-adu a tropa ti Amerikano iti nadumaduma a paset ti pagilyan para iti agsasaruno a war games a maar-aramid iti tinawen a Balikatan. Kabilang ditoy ti Combined Joint Logistics Over-the-Shore (Aurora), Command-and-Control Exercise (Que-zon City), Multilateral Maritime Exercise (South China Sea), Salaknib (Nueva Ecija), Cope Thunder (Pampanga) ken Marex (Cotabato City). Nayon dagitoy ket dagiti pammarang nga operasyon sibil-militar, kas kadagiti serbisyo a dental ti US Navy kadagiti sibilyan a komunidad idiay Palawan ken Mindanao.

Tampok iti Balikatan tatta a tawen ti panagaramat ti NMESIS (Navy Marine Expeditionary Ship Interdiction System) a naiserrek iti pagilyan idi Abril 17, kagiddan dagiti kabinnadang daytoy nga unmanned surface vehicles. Naitayab ti umuna a bats dagiti NMESIS kadagiti isla ti Batanes nu sadinno a maikabil dagitoy iti maitakder a Fires Expeditionary Advanced Base wenno EAB. Agserbi daytoy nga outpost dagiti espesyal a pwersa ti US tapno kontrolen ti Bashi Channel, ti akikid a lungog ti baybay iti nagbaetan ti Pilipinas ken Taiwan. Immunan nga inpwesto ti US ditoy ti Typhon Missile System a naiserrek iti pagilyan idi Balikatan 2024.

Adda ti awtoridad dagiti pwersa nga Amerikano iti EAB a “mangputok” iti “kabusor a barko” uray nakapauneg da iti teritoryo ti Pilipinas. Pagbalbalinen daytoy dagiti isla ti Batanes kas firing line ti US Navy. Iti kastoy, direkta daytoy nga ikabkabil ti umili iti Batanes, ken ti intero nga amianan a daya a Luzon, iti umuna a linya ti panagatake nu bilang bumtak ti armado a risiris iti baet ti US ken China, nangruna iti Taiwan.

Pormal met a marugian iti Balikatan 2025 ti operasyon ti Littoral Rotational Force-Luzon, maysa a yunit ti US Marines a permanente a dumket kadagiti igid-baybay ti Luzon. Ditoy met nga umuna a direkta a pumaset dagiti pwersa ti Japan iti war games, kalpasan ti mano a tawen nga agob-obserba daytoy.

Ibilbilang ti China dagitoy a maniobra kas panangpakaro wenno “escalation” dagiti tensyon iti baet daytoy ken ti US. Pinakdaaran ti China ti rehimen Marcos a saan nga agpausar iti US kas “proxy deterrence,” nangruna iti Bashi Channel.

Basar kadagiti pangpubliko a rekord, masansan ti panagaramat ti US kadagiti aircraft carrier iti teritoryo a baybay ti Pilipinas. Malaksid iti Bashi Channel ken Sulu Sea, balballasiwen dagiti barko a panggubat ti US dagiti kabaybayan iti baet dagiti isla (ti San Bernadino Strait idiay Samar, Leyte Gulf, Balabac Strait idiay Palawan ken Surigao Strait). Maysa kadagitoy a barko ti aircraft carrier a USS Theodore Roosevelt. Dimket daytoy kadagiti pagaapaan a teritoryo, kas ti Paracel Islands ken Scarborough Shoal, ken nangguyugoy ti nayon a presensya dagiti barko ken eroplano a Chinese.

Saan a bumaba iti uppat a barko a pangsurbey iti tereyn iti uneg ti baybay a patpatarayen ti US Navy ti dandani awan-ressat a nagtalinaed iti South China Sea idi 2024. Saklaw ti isursurbey dagitoy ti Bashi Channel, Balabac Strait ken Verde Island Passage iti baet ti Mindoro ken Batangas.

Ti Pilipinas ket dalan met dagiti eroplano a pangbomba a patpatayaben ti US Air Force manipud iti base militar daytoy iti Guam tapno agpatrulya iti South China Sea. Idi 2024, namonitor ti China ti 32 beses a panagipatulod ti US kadagiti eroplano a pangbomba tapno agiyaramid ti 56 a sortie/misyon, dua a daras nga ad-adda a masansan kumpara iti inyaramid daytoy idi 2023. Komun a ruta dagitoy nga eroplano ti Bashi Channel iti amianan ken Sulu Sea iti abagatan ti pagilyan.

Ti pagilyan ket pakaisaysayangkatan met dagiti unmanned aerial vehicle kas ti MQ-9 Reaper UAV a nakabase idiay Clark Airbase ken Palawan iti sidong ti Task Force-Ayungin ti US. Iti napalabas a Balikatan, nagipatayab ti US kadagiti eroplano a paniktik laban iti China manipud kadagiti base daytoy iti Clark Airbase idiay Pampanga; Fort Magsaysay idiay Nueva Ecija, Lal-lo Airport ken Camilo Osias Naval Base idiay Cagayan; Benito Ebuen Air Base idiay Cebu ken uray iti Ninoy Aquino International Airport.