Panindugan batuk sa pagmina. Sa isa ka porum sa Tabuk City, Kalinga sadtong Abril 12, nagpahayag sang pagpamatok ang kapin sa 100 ka pumuluyo batuk sa nagahana nga pagmina sang Makilala Mining Company Incorporated (MMCI) sang ila nga banwa. Sakupon sang MMCI ang tatlo ka lugar sa Pasil, Kalinga—ang Maalinao, Caigutan kag Biyog—nga sakup sang duta sang katigulangan sang Tribu Balatoc kag mga bahin sang Guinaang. Sang sini lang, ang MMCI ginhatagan sang rehimen Marcos sang pondo halin sa Maharlika Fund agud padayunon ang mapanghalit nga mga proyekto sini.

Kalbaryo sang pumuluyo ang rehimen Marcos. Naglunsar sang hublag malapit sa Mendiola ang mga imol nga tagasyudad sa pagpanguna sang Kadamay nga gintawag sini “Kalbaryo sang Pumuluyo” sadtong Abril 16. Kaupod sang grupo ang mga pamilya sang mga biktima sang ekstra-hudisyal nga pagpamatay sa idalum sang nagligad nga administrasyon Duterte kag mga imol nga nakaagi sang demolisyon sang ila mga puluy-an, mga pamatan-on kag mamumugon. Naglunsar sang pareho nga hublag sa amo nga adlaw ang Kadamay-Negros, mga grupo sang imol, mangingisda kag mangunguma sa Bacolod City.

Dalagan batuk sa pang-abuso. Naglunsar sang “Dalagan Babaye 2025” ukon ang pagdalagan batuk sa abuso ang Gabriela Women’s Party sa sulod sang kampus sang University of the Philippines-Diliman sadtong Abril 13. Suno sa GWP, ang ila hublag pagpakita sang panindugan “batuk sa kalakasan nga nakabase sa kasarian.” Ginatos ang nagpakigbahin lakip ang mga kilala nga personalidad kaangay sang mga artisa nga sila Barbie Forteza kag Ryza Cenon, kag Miss Globe runner-up nga si Rowee Lucero.

Itum batuk sa pasaka sukot sa matrikula. Naglunsar sang hublag protesta ang mga estudyante kag myembro sang Anakbayan-Adamson University sadtong Abril 11. Nagsuksok sila sang mga bayo nga itum agud hatagan sang tum-ok ang ila pagpamatok sa plano nga 5% nga pasaka sa matrikula sa unbersidad para sa akademiko nga tuig 2025-2026. Katumbas sini ang dugang nga ₱2,500 sa matrikula. Sadtong 2022 ulihi nga nagpatuman sang pasaka sa matrikula ang unibersidad nga naglab-ot sa 5.8%.