Gindakup sang mga pwersa sang estado ang isa ka pamilya sa Sorsogon, duha ka mangunguma sa Quezon kag Masbate, kag mga pamatan-on sa Isabela sa nagligad nga sinemana. Ginpasibangdan sila sang lain-lain nga kasong kriminal kag pagka-imbolbar sa Bagong Hukbong Bayan (BHB).

Sadtong Abril 17, gindakup sang mga pulis kag sang 31st IB si Gilberto Tolentino, 50 anyos nga mangunguma, ang iya asawa nga si Amelia, 47, anak nga si Regine, 21, kag ila 2-tuig nga apo sadtong Abril 17. Ginkuha sila sang mga pwersa sang estado sa Barangay San Vicente, Donsol, Sorsogon kag subong indi makita sang mga himata.

Suno sa report, si Gilberto lang ang luyag nga kuhaon sang mga pwersa sang estado apang nagpamalibad ang iya asawa kag mga himata amo nga nag-upod sila tanan. Sadtong Abril 18, gilayon nga nagkadto ang mga himata sang mga Tolentino kag opisyal sang barangay sa istasyon sang pulis sa Donsol kag sa kampo sang militar sa Barangay San Jose agud makita ang mga biktima. Ginpanginwala sang mga pulis kag militar nga yara sa ila kustodiya ang pamilya.

Sa Masbate, gindakup sang 2nd IB si Isabel delos Reyes, 56, sibilyan nga mangunguma halin sa Barangay Libertad, Cawayan sadtong Abril 17. Sunod ini sang engkwentro nga natabo sa tunga sang 2nd IB kag BHB-Masbate (Jose Rapsing Command) sa adlaw nga ini sa dulunan sang Barangay Miabas, Palanas kag Barangay Libertad, Cawayan. Ginkuhaan siya sang litrato nga may gina-uyatan nga pusil kag ginpilit nga maghimo sang estorya nga “nangilkil” ang yunit sang BHB sa mga lokal nga kandidato sa eleksyon 2025.

Sa Quezon, gindakup sang militar si Rico Endrinal, mangunguma nga residente sang Barangay Sugod, Lopez sadtong Abril 6. Ginsaylo-saylo siya sang bilangguan kag ginpabudlayan ang pamilya nga maestorya siya. Pagkatapos sang insidente, nagkampo sa ila komunidad ang mga soldado kag wala-untat ang pagpang-ipit sa iya pamilya.

Sa Isabela, gindakup sang 5th ID si Andy Magno sang Kabataan Party-list kag kaupod niya nga Agta samtang nagakampanya sa Barangay Dicamay Dos, Jones sadtong Abril 20. Si Magno gradweyt sang University of the Philippines-Manila.