Hustisya ang gipangayo sa mga paryente alang sa 24-anyos nga si Junjun Binoy nga gipatay sa mga sundalo sa 94th IB sa Sityo Bugtangan, Barangay Buenavista, Himamaylan City, Negros Occidental niadtong Hunyo 6. Gipagawas sa mga sundalo nga myembro siya sa Bagong Hukbong Bayan (BHB) ug napatay sa usa ka armadong engkwentro.

Samtang, gitortyur ug gikulata sa mga sundalo ang 59-anyos nga amahan ni Binoy nga si Judy, nga kauban niya niadtong panahona.

Sa Surigao del Sur, gipatay sa mga elemento sa special forces sa militar ang 25-anyos nga si Davie Ugking sa Km 9, Barangay Diatagon, Lianga niadtong Hunyo 6. Pauli na unta ang biktima gikan sa trabaho sa dihang gidakop siya sa militar. Gitortyur si Ugking sa wala pa siya gipatay base sa mga pali ug samad sa iyang lawas.

Pag-aresto. Sa Agusan del Sur, siyam ka indibidwal ang gidakop sa mga pulis ug militar samtang nagbyahe ug gipahunong sa usa ka tsekpoynt sa lungsod sa Bunawan niadtong Hunyo 13 sa gabii. Ang mga nadakpan mao sila Charisse Bernadine Bañez, Ronnie Igloria, Louvaine Erika Espina, Sinag Lugsi, Larry Montero, Daryl Man-Inday, Arjie Guino Dadizon, Grace Niknik Man-aning, ug Leo Taba, uban ang duha ka drayber. Gidakop sila tungod sa lain-laing mga kasong kriminal ug mga akusasyon nga myembro sila sa Bagong Hukbong Bayan.

Matud sa report, pugos silang gipanaog sa mga sakyanan ug gipahapa sa yuta sulod sa duha ka oras. Human niini, gihimo ang “pag-utingkay” sa ilang mga butang ug sakyanan diin “nakumpiska ang mga armas ug eksplusibo.” Sa sunod adlaw, nareport nga nawala si Taba ug ang duha ka drayber sa van nga ilang gisakyan.

Sa Bohol, gidakop ang general secretary sa Hugpong sa mga Mag-uumang Bol-anon (HUMABOL)-KMP nga si Joemar Pogio sa iyang balay sa San Miguel niadtong Hunyo 8 sa dili pa klaro nga kaso.

Demolisyon. Sa Bukidnon, taliwala sa hugot nga pagsupak sa mga residente, gipadayon sa Central Mindanao University, uban sa gatusan ka mga pulis, ang bangis nga demolisyon sa mga balay sa mga mag-uuma nga nanimuyo sa Barangay Dologon, Maramag niadtong Hunyo 16. Ang mga residente myembro sa Buffalo-Tamaraw-Limus Multipurpose Cooperative ug Musuan Inhabitants’ Landless Farmers Association.

Giguba ang gatusan ka balay sa demolisyon, diin 1,566 ka mag-uuma ang wala nay mapuy-an. Lima ka residente ang gidakop sa mga pulis human sila nanghangyo nga anihon ang ilang mga tanum nga humay.