Malab-ot sa 16 ka raliyista ang napatay kag 400 ka iban pa ang napilasan sang mapintas nga ginbungkag sang rehimen US-Ruto sang Kenya ang mga protesta sang pumuluyo sadtong Hunyo 25. Ang protesta kabahin sang pagdumdum sa serye sang higante nga mga demonstrasyon nga ginlunsar sadtong nagligad nga tuig batuk sa neoliberal nga hagna nga Finance Bill 2024, nagasingki ang kapintas sang pulis kag pagpangsumpo sang estado.

Madumduman nga napaatras sang higante nga hublag sadtong 2024 ang rehimen US-Ruto sa plano nga pagpatuman sang mga mabug-at nga buwis nga dikta sang International Monetary Fund (IMF) nga labi nga magapaantus sa masang Kenyan. Para tuso nga ipalusot ang mga buwis, bahin-bahin ini nga ginpasar sang parlyamento sang Kenya sang nagligad nga tuig.

Ginlunsar ang mga hublag sa Nairobi, Mombasa, Kisii, kag iban pa nga syudad. Dala-dala nila ang bandera sang Kenya kag nagasinggit sang panawagan nga “Ruto Must Go” (Palayason si Ruto) kag “Occupy Statehouse” (Sakupon ang Statehouse ukon puluy-an ni Ruto bilang pinuno sang gobyerno). Dala man nila sa mga protesta ang mga larawan sang mga nagkalamatay sadtong nagligad nga tuig sa kalakasan sang pulis batuk sa demonstrasyon.

Nagpahayag sang suporta kag pagpakig-isa sa paghimakas sang masang Kenyan ang International League of Peoples’ Struggles Africa kag West Asia Regional Committee. Gina-engganyo nila ang mga Kenyan nga labi pa nga magpurigi sa atubang sang nagasingki nga pagpangsumpo.

“Husto lang nga magpadayon sa pag-organisa sa mga Kenyan kag maglunsar sang mga aksyon masa agud isulong ang panawagan para sa pungsodnon nga kahilwayan kag demokratikong kinamatarung,” pahayag sang komite. Kaangay sang ginpakita sang lapnagon nga demonstrasyon sang pumuluyong Kenyan sadtong 2024, nagapati ang ILPS nga masarangan nga iduso sang nagadako nga hublag ang rehimen Ruto nga ipaatras ang mga dunot sini nga mga patakaran.