Sa katapusan sang bulan, magatindog si Marcos sa atubang sang Kongreso agud liwat bilogon ang ulo sang pumuluyo tuhoy sa mga “nahimo” niya sa nagligad nga tatlo ka tuig. Tuman ka laba sang ginpangtagpi-tagpi sini nga kabutigan pero indi sini matago ang wala sang katapusan nga pag-antus nga ginaagum sang pumuluyo sa idalum sang iya paghari. Wala untat ang pagsarurot sang lebel sang pangabuhi sang mayoriya sang pumuluyo. Wala sang tupong ang korapsyon sang pamilya Marcos. Bulag ang pagsunod sini sa dikta sang iya agalon nga imperyalismong US. Nagasingki ang pangpulitika nga pagpang-ipit batuk sa pumuluyo nga nagatindog kag nagapamatuk.

Dala ni Marcos ang labi nga pag-antus sang kinaandan nga pumuluyo. Palas-anon pa gihapon sang pumuluyo ang mataas nga presyo sang bugas, nga indi matabunan sang pakitang-tawo nga palagwaon ni Marcos. Kakunsabo si Marcos sang mga kumpaniya sang lana sa pagtimbuok sang presyo sang diesel kag gasolina. Sa pihak sang malapad nga panawagan, ginpunggan sang Malacañang ang hagna nga ₱200 nga dugang sa adlawan nga sweldo sang mga mamumugon, kag imbes, dugang pa nga buwis ang ginpapas-an sa abaga sang pumuluyo. Wala-tuo ang kakasanay sa trabaho, lapnagon ang disempleyo, linaksa ka libo ang nagakapwersa nga mangita sang trabaho sa luwas sang pungsod, samtang ginatos ka libo nga mga imol ang ginpalayas sa ila ginapuy-an, kag patarasak nga gina-agawan sang duta, pangisdaan kag mga kuluhaan sang palangabuhian.

Ginpatuman nila ang mga patakaran kag programa nga labi nga nagapahabok sa mga dumuluong nga mga dalagko nga kapitalista, kag mga kahimbon nga mga dalagko nga burgesya kumprador, agalon mayduta kag burukrata kapitalista. Wala-tuo ang pagpangutang ni Marcos nga wala man ginabenepisyuhan sang pungsod, kundi nagakadto lang sa pangpa-ulbo nga mga proyektong pang-imprastruktura nga ginakuhaan sang kikbak ni Marcos kag mga korap niya nga opisyal. Ginatos ka bilyon ka piso nga kinawat nga manggad sang mga Marcos ang ginbalik sa ila kontrol, samtang ginatos ka bilyon ka piso ang ginhugakom sa dagway sang Maharlika Investment Fund, confidential kag intelligence funds ni Marcos, kag ginwaldas ang sobra-sobra nga gasto sa militar, sa kahalitan sang kinahanglanon nga mga sosyal nga serbisyo.

Kaangay sang nagliligad nga mga rehimen, ginapaburan ni Marcos ang mga dalagko nga mga dumuluong kag lokal nga mga kapitalista kag para makahugakom sila sang maksimum sini nga ganansya. Ginalansang ni Marcos ang sweldo sang mga mamumugon samtang ginakaltasan sang buwis ang mga kapitalista. Ginhatagan niya sang ligwa ang pagpanag-iya sang duta sa Pilipinas (sa tabon sang layi nga nagapahanugot sa 99 ka tuig nga pag-“arkila”), kag ginakuha ang mga regulasyon pang-kapalibutan agud wala sang sagang ang pagpangkawkaw kag pagpangwasak sang dunang manggad sang pungsod.

Ginahatagan sila ni Marcos sang armadong proteksyon sang militar kag pulis, nga ginagamit sa pagpang-ipit sa pumuluyo nga nagapangapin sa ila duta kag palangabuhian. Sa kasyudaran, ginapuntirya sang mga pasistang gaway sang reaksyonaryong estado ang mga mamumugon nga nag-unyon kag nagatindog agud ipakigbato ang ila mga demanda nga dugang nga sweldo. Ginagamit ni Marcos ang NTF-Elcac kag ang “Anti-Terrorism Law” sa pagsumpo sa mga kinamatarung sang mga mamumugon, mala-proletaryado, pamatan-on-estudyante, mangingisda, kababaenhan kag iban pa nga demokratikong sektor agud punggan sila nga mag-organisa kag magpakigbahin sa kahublagan para sa pagbag-o sosyal.

Sa kaumhan, hayagan ang terorismo sang estado sa pagpatuman sang layi militar sa mga barangay kag komunidad, nga ginasiling sang NTF-Elcac nga nagasuporta sa armadong rebolusyonaryong kahublagan. Wala-tuo ang ektrahudisyal nga pagpamatay, pagpangkugmat, pagpang-abukay sa mga kabalayan, iligal nga pagpang-aresto, “pagpasurender,” patarasak nga pagpalupok sang pusil, pagpang-kanyon kag paghulog sang bomba sa mga uma kag kabukiran malapit sa mga komunidad. Bata man ukon tigulang, wala sang ginapili nga biktima ang brutalidad sang mga pasistang tinawo ni Marcos. Pinakamapintas ang pagpangsumpo sang rehimen Marcos sa mga interyor nga baryo kag sityo sang mga mangunguma kag tumandok nga pumuluyo, nga gina-agawan sang duta sang mga dumuluong nga kumpaniya sang pagmina, mga plantasyon, proyektong pang-enerhiya kag eko-turismo.

Ginagamit ni Marcos ang karatula sang “kalinong” agud tabunan ang gyera sang pagpangsumpo sini sa makibanwahanon kag demokratikong kahublagan sang pumuluyong Pilipino. Ini ang handum sang mga imperyalista kag nagahari nga sahi nga “kalinong” nga nakabusal ang mga pigos kag ginahimuslan. Indi amo sini ang makatarungan kag pangmalawigon nga kalinong nga handum sang pumuluyo, nga maagum lang paagi sa pagsabat sa ila sandigan nga mga demanda para sa libre nga pagpanagtag sang duta, pungsodnon nga industriyalisasyon, matuod nga kahilwayan kag demokrasya.

Sa duso sang agalon sini nga imperyalista, ginmando ni Marcos nga pasingkion ang gyera para kuno dugmukon ang Bagong Hukbong Bayan.Todo-todo ang pagpakigkunsabo ni Marcos kag sang AFP sa pwersang militar sang US sa pagpwesto sini sang mga tropa, salakyan kag armas militar sa Pilipinas, kag sa paglunsar sang asod-asod nga mga paghanas sa gyera nga nagapuntirya sa China, ginapainit nga ginapainit sang rehimen Marcos ang armadong tensyon sa South China Sea.

Wala sang masaligan ang pumuluyong Pilipino sa paantus, pasista, kag papet nga rehimen Marcos. Samtang nagapungko si Marcos sa Malacañang, gamiton niya ang iya poder para mas nga kawkawon ang kaban sang manggad sang pungsod, palawigon ang iya gahum, kag magdis-uganay sa iya mga karibal. Wala sang iban nga makadtuan ang pumuluyo kundi ang magtindog kag pakigbatuan ang rehimen US-Marcos.

Dapat palaparon kag palig-unon sang pumuluyo ang ila organisadong kusog. Sa kasyudaran, dapat ubos-kusog nga hugpungon ang mga mamumugon, mala-proletaryado kag mga pamatan-on-estudyante, bilang salandigan sang kusog sang iban pa nga mga demokratikong sektor. Dapat papagsikon ang mga demokratiko kag kontra-imperyalista nga paghimakas masa sa mga pabrika, komunidad kag mga eskwelahan.

Sa kaumhan, dapat pabaskugon kag palaparon ang hukbong bayan kag ang mga sanga kag komite sang seksyon sang Partido agud ubos-kusog nga tukuron kag itukod liwat ang mga organisasyon sang mangunguma agud magpangapin batuk sa pasismo, kag agud isulong ang mga paghimakas batuk sa mga pyudal kag mala-pyudal nga paghimulos, kag pabaskugon ang singgit para sa matuod nga reporma sa duta. Dapat papagsikon ang paglunsar sang mga taktikal nga opensiba kag ispesyal nga operasyon agud silutan ang pinakabangis nga pasista kag sabton ang ginapangayo nga hustisya sang pumuluyo.

Wala sang iban nga nagakadapat nga sabat ang pumuluyong Pilipino kundi ang pagpapagsik sang kahublagan masa kag armadong paghimakas agud pakig-awayan ang pagpamigos kag pagpang-ipit sang rehimen US-Marcos. Sa wala sang pagkataka nga pagpanikasog sa banas sang pakig-away, pat-od nga mapasabat si Marcos kag atubangon ang paghusga sang bug-os nga pumuluyo.