Ginpirmahan sadtong Hunyo 26 sang rehimen Marcos kag sang US Trade and Development Agency (USTDA), ang kasugtanan para sa pagpautang sang gobyernong US sang $3.8 milyon para sa pauna nga pagpanalawsaw kag pagtuon sa proyektong Subic-Clark-Manila-Batangas (SCMB) Railway. Katuyuan sang proyekto nga magbutang sang sistema sang riles para sa transportasyon sang mga baligya para buhinan kuno ang pagginutok sa pantalan sa Manila.

Sa kalabaon nga 250 kilometro, sugpunon sang SCMB Railway ang Subic kag Clark, lahos sa National Capital Region tubtob sa pantalan sang Batangas. Base sa plano sang USTDA, magasugod sa 2027-2028 ang konstruksyon sang bahin sang Subic-Clark, kag sa 2028-2029 ang konstruksyon sang bahin sang Clark-Manila-Batangas. Target sini nga sugdan ang operasyon sang riles sa temprano nga bahin sang 2030. Ginabana-bana nga maglab-ot sa $3.2 bilyon ang bili sang bug-os nga proyekto.

Una nga gintanyag sang rehimen Duterte ang proyekto nga riles sa tunga sang Subic kag Clark sa gobyerno sang China sadtong 2016. Nagpangako ang China sadtong 2018 nga pondohan ini apang ginbawi ini sadtong 2022. Sa pagpungko sang rehimen Marcos sa poder, liwat ini nga ginbuhi kag ginpalaba tubtob Batangas sa sulsol sang US.

Ginpaidalum ang proyekto nga ini sa ginatawag nga Luzon Economic Corridor (LEC), isa ka trilateral nga programa sa tunga sang US, Pilipinas kag Japan nga nagatuyo nga padasigon ang pagtambak sang ila kapital, tinawo kag gamit sa dagway sang mga proyektong imprastruktura sa renewable energy, pantalan, paluparan, taytay kag dalan. Ang LEC ang una nga proyekto sang Partnership for Global Infrastructure and Investment sang US kag yabe nga bahin sang estratehiya sini nga Indo-Pacific batuk sa China, partikular kontra sa Belt and Road Initiative sini.

Magluwas sa SCMB Railway, ginpaidalum man sa LEC ang 27 ka iban pa nga proyektong imprastruktura lakip ang pagpalapad sang Clark International Airport, Bataan-Cavite Interlink Bridge, Subic Bay (Redondo-Ilanin) Bridge, Central Luzon Link Expressway, North Luzon East Expressway, Laguna Lakeshore Road Network Development, Kalaanan Irrigation Project, North-South Commuter Railway, New Clark City Extension Railway kag Southern Batangas Airport.

Ang SCMB Railway kag iban pa nga imprastruktura itukod para sa gamit sang mga dumuluong nga kumpaniya, kaangay sang mga kumpaniyang Amerikano sa pagmanupaktura kag baterya nga luyag magpulos sa manggaran nga rekurso sang nickel, cobalt, copper kag bauxite sang Pilipinas.

Target sang US, kabulig ang Japan kag mga pungsod sang NATO, nga magtambak sang tubtob sa $100 bilyon nga kapital sa masunod nga 10 ka tuig. Kadam-an sang pondo nga ini sa dagway sang utang kag pribado nga kapital, nga luwas sa pagbuwis kag wala direkta nga angot sa lokal nga ekonomiya.

Upod sa mga katuyuan sini sa ekonomiya, ang SCMB Railway kag ang iban pa nga proyekto sa idalum sang LEC may maathag nga katuyuan militar kag heyopulitikal. Sugpunon sang SCMB Railway kag sang network sang mga taytay kag dalan ang mga dalagko nga “EDCA site” ukon mga base militar sang US sa Luzon, kag pahapuson ang pagsaylo-saylo sang mga armas, tinawo kag salakyan militar sa mga ini. Pahapuson man sini ang ang transportasyon militar sa iban pa nga bahin sang Luzon. Samtang, ang pagpalapad sang paluparan sa Clark magaserbe sa mga eroplanong pang-gyera sang US, nga subong may mga malapad na nga hangar kag pradahan sa katambi nga Basa International Airport.

Mas nga maathag ang katuyuan militar sang LEC sa sini lang nga anunsyo sang Kongreso sang US nga plano nga pagtukod sang pabrika sang bala sa sulod sang Subic. Antes sini, nag-arkila na sang dalagko nga bodega ang US sa Subic para ipwesto ang gamit-militar nga kuno kabahin sa paghanda sa mga kalamidad.

Lapaw sa Pilipinas, kabahin ang LEC sa mas malapad nga estratehiya sang US agud punggan ang nagalapad nga impluwensya sang China sa Southeast Asia. Bisan nagapabilin nga dominante ang pangapital sang US sa rehiyon, madamo nga pungsod diri ang mas nagasakdag sa pangapital sang China para sa mga dalagko nga proyekto sa imprastruktura, pagmanupaktura kag pagmina, kag kon amo indi magsira sa heyopulitikal nga mga katuyuan sini. Indi pareho sang Pilipinas, nagalikaw ang mga pungsod sa ASEAN nga mahigot sa eksklusibo nga alyansa militar sa US.