Sa nagligad nga mga sinemana, nalista ang lima ka biktima sang pangpulitika nga pagpamatay sang mga pwersa sang estado. Magluwas diri, may yara man mga kaso sang pagpang-aresto, pagpangluthang kag pagpang-ipit. Dugang ang mga ini sa nagasinampaw nga krimen sang rehimen US-Marcos sa iya tatlo ka tuig sa poder.

Sa Masbate, ginratrat sang bala kag ginpatay sang mga pwersa sang estado ang 25-anyos nga sibilyan nga si Joey Oas sa Barangay San Carlos, Palanas sadtong Hunyo 29. Ginapaguwa siya nga “nagbato” kag nakuhaan sang pusil, mga magasin kag bala. Ginapasibangdan man siya nga katapo sang sparrow yunit sang Bagong Hukbong Bayan (BHB).

Sa Leyte, hungod nga ginpatay sang 93rd IB kag 802nd IBde ang duha ka hors de combat nga katapo sang BHB kag isa ka medik sadtong Hunyo 18 sa Barangay Cogon, Carigara. May balatian kag nagapaayo sadto sanday Juanito Selleca Jr (Ka Tibor/Ka Rey) kag Sadam Paclita (Ka Dimple) sang salakayon kag ginpangluthang sang mga soldado. Ginpatay kaupod nila si Lino Delante (Ka Dodong), isa ka medik nga naga-atipan sa mga pasyente. Indi armado ang tatlo.

Sa General Santos City, ginpangluthang kag ginpatay sang wala pa nakilal-an nga mga tawo si Ali Jejhon S. Macalintal, isa ka brodkaster sa radyo sadtong Hunyo 23 sa Barangay Lagao. Si Macalintal, isa ka transwoman, nangin aktibo nga katapo sang mga progresibo nga grupo halin sadtong 2002. Sadtong 2024, nag-report si Macalintal nga gina-ipit kag ginatiid siya sang mga ahente sang Task Force Gensan. Pila ka adlaw antes luthangon, nakabaton siya sang mga pamahog sa iya kabuhi.

Pag-aresto. Lima ka aktibista pangkultura ang gin-aresto sang mga pwersa sang estado sadtong Hunyo 27 sa Barangay Pasong Buaya II, Imus, Cavite. Sa kasagsagan sang ila oplan pinta, ginsundan sila, gindumog, ginpahog gamit ang pusil,antes gindala sa barangay hall. Temporaryo sila nga nahilway sadtong Hulyo 1 kag naga-atubang sang mga kaso nga malicious mischief kag bandalismo.

Pagpangluthang. Sa Negros Oriental, patarasak nga nagpalupok sang pusil ang mga “trigger happy” nga soldado sang 62nd IB sa Sityo Putat, Barangay Humay-humay sa Guihulngan City sadtong Hunyo 23.

Sang sunod nga adlaw, pilit nga ginsulod sang mga soldado ang balay ni Bobby Gemodo sa Sityo Laos, Barangay Binobohan sa syudad agud ipiton siya. Ginkadtuan man sang mga soldado ang balay ni Mario Noyad sa Sityo Natae, Barangay Binalbagan, Canlaon City agud hadlukon kag pahugon siya.