Sa tunga sang wala puas nga mga operasyon militar halin 2024, madinalag-on nga ginlunsar sa isa ka larangan gerilya sa Southern Tagalog ang isa ka kumperensya sa hilikuton masa kag hilikuton militar. Mayor nga katuyuan sang pagtililipon sang mga yunit sang Bagong Hukbong Bayan (BHB) ang magsuma kag magpaambitanay sang mga eksperyensya agud mas maayo nga maatubang ang nagasingki nga kampanyang pangdugmok sang Armed Forces of the Philippines (AFP) sa subrehiyon. Nagtambong diri ang namikskla nga mga tigulang, nahanunga kag mga huben nga mga kadre. Sobra sa tunga sang nagtambong mga pamatan-on.

Magtuon, manadlong, magsulong

Ginbuksan ang kumperensya sang pagtuon sa duha ka kaso nga tulun-an sa hilikuton masa. Ginkuha ang mga ini sa inagihan sang duha ka yunit sang Hukbo sa mas o menos isa ka tuig. Mayor nga punto nga gindiskusyunan ang manera sang mga yunit sa hilikuton masa: ang pagbalanse sa hilikuton pagpalapad kag pagpadalum, kag ang kadugayon sang pagkampo sang mga yunit kag ang kalapiton sang mga ini sa mga lugar kon diin may konsentrasyon sang masa. Matalum nga gintumbok ang konserbatismo sa hilikuton masa kag mga paborito nga mga base nga ginatadlong subong.

Gintumod ang yabe nga papel sang hilikuton edukasyon, propaganda, kultura kag hilikuton medikal sa epektibo kag nagatagos nga hilikuton masa. Isa ka maayo nga halimbawa sini ang paghimo sang isa ka iskwad sang praymer sa isa ka banwa nga nagatalakay sa subong nga sitwasyon kag problema sang masa pati na ang manggaranon nga rebolusyonaryo nga kasaysayan sang banwa halin sa sosyal nga imbestigasyon. Epektibo nga nagamit ang praymer agud hugpongon ang masa kag tukuron ang mga grupo kag tsapter sang mga rebolusyonaryong organisasyon masa sa sining banwa.

Ginpunting man ang kakinahanglanon sang pagpakigbahin sang Hukbo sa produksyon sang masa kag paghatag sa ila sang serbisyo medikal sa hilikuton masa. Sa mga positibo kag negatibo nga inagihan nga ginhapag, nagtingkad ang desaysibo nga papel sang husto nga pagpamuno sang Partido kag ang malig-on nga paghiliusa agud mapaabante sang Hukbo ang hilikuton masa sa pihak sang mga upang, kabudlayan kag nagabag-o bag-o nga sitwasyon. Pagkatapos sang paghapag sang mga kaso nga tulun-an, gin-rebyu ang “Mga Sandigan nga Prinsipyo sa Hilikuton Masa sa Kaumhan.”

Ang sunod nga ginhapag kag gindiskusyonan ang mga kaso nga tulun-an sang madinalag-on kag paslaw nga taktikal nga opensiba lakip ang pila ka mga depensiba nga awayan. Ginpatingkad sa mga kaso nga tulun-an ang kakinahanglanon sang hilikuton paniktik kag pag-organisa kag pagpahulag sa masa para sa hilikuton nga ini.

Pareho sa hilikuton masa, matingkad sa mga kaso nga tulun-an ang kakinahanglanon sang absoluto nga pagpamuno sang Partido sa Hukbo agud pahugton ang paghiliusa sa ano man nga sitwasyon nga atubangon. Kon wala ang amo nga pagpamuno sang Partido, indi mahimo ang maayo nga pagdepensa batuk sa kaaway kag pagdugmok diri nga amo ang nagapanguna nga katungdanan sang Hukbo. Pagkatapos gintun-an ang “Mga Hambalanon sa Estratehiya sa Rebolusyonaryong Inaway sang China” ni Mao Zedong.

Ang ubod sang pagsuma sang mga inagihan sa hilikuton masa kag militar kag pagtuon liwat sa teorya tuhoy diri amo ang pagsapol kag pagpadalum sang mga kadre sa ila paghangup sa mga sandigan nga prinsipyo sang pakig-away gerilya sa halintang sang estratehikong depensiba kag sa kahimtangan sang pagpabalik sang kusog sang BHB halin sa pag-atras nga ginbunga sang mga pangsulod nga kahuyangan kag sa pag-atubang sa atake sang kaaway.

Naglunsar sang kapehan sa pila ka sesyon sa gab-i kon diin ginpaambit ang eksperyensya sa pagpasampa sang pamatan-on nga mangunguma, tumandok kag pamatan-on-intelektwal. Naghatag ini sang mga bulawanon nga pagtulun-an kag inspirasyon kon paano papagsikon ang pagpasampa sa BHB kag kon paano palig-unon kag paayuhon ang mga Pulang hangaway sa tunga sang masingki nga pakig-away sa kaaway.

Agud ugaton sa ideolohiya ang mga kahuyangan kag problema, gintun-an man ang “Espesyal nga Kurso sa Empirisismo” kag “Bahin sa Praktika” ni Mao. Katuyuan sini nga epektibo nga puntingon ang empirisistang tendensya sang panghuna-huna kag praktika nga ginapakita sa mga kaso nga tulun-an. Partikular nga dagway sini ang pagpakuntento sa bulag-bulag nga datos bahin sa kahimtangan kag palangabuhian sang masa, manabaw nga paghibalo sa rebolusyonaryong kasaysayan sang mga erya kag hilaw nga paniktik. Maathag sa inagihan sang larangan nga ang indi pagkumpleto kag kakulangan sa paghimo sa sosyal nga imbestigasyon kag pag-analisa sa sahi nagabunga sang mga wala nagasanto nga patakaran kag programa sa pulitika kag mga plano militar.

Sa pagtapos sang kumperensya, ginpangayuan ang mga tumalambong sang ila mga repleksyon. Suno kay Ka Lima, “Kinahanglan nga isikway ang suhetibismo kag indibidwalismo sa kasuok-suokan sang pagkatawo naton, ang arogansya, ang pagka-kampante sa tanan nga aspeto. Tuman ka hapos ang maghambal, apang ang tuman nga panghangkat yara sa aktwal. Bag-uhon naton ang pamaagi sang panghuna-huna para mangin maalam ang aton pag-analisa sa mga butang kag mangin husto ang mga tikang naton sa pagsolbar sa mga problema.”

“Makig-away agud magpabaskog! Magpabaskog samtang nagapakig-away!” Ini ang panawagan sang kahublagan panadlong sa mga rebolusyonaryo sa Southern Tagalog.

Sa pihak sang alatubangon nga sitwasyon militar, mataas ang espirito sang mga Pulang kumander, giya pangpulitika kag hangaway sang nagbululagay ang mga yunit para sa mga panibag-o nga hilikuton nga gintalana sang kumperensya. Maathag ang hangkat para sa Partido kag Hukbo sa subong nga kritikal nga halintang sang rebolusyonaryong kahublagan: Abagahon ang nagadamo kag nagadako nga mga hilikuton kag sakripisyo nga may wala nagakupas nga espirito sang pag-alagad sa pumuluyo kag pagsalig sa kahustohon kag kadalag-an sang rebolusyon.