Duha nga unyon an madinaugon nga nagpinal han kada tagsa nira nga collective bargaining agreement (CBA) hadton Hulyo ngan Agosto.

Igin-anunsyo han Unyon ng mga Panadero sa Gardenia Bakeries Philippines Inc.(UPGBPI-OLALIA-KMU) an kadaugan ha ira pakikignegosasyon para ha bag-o nga CBA hadton Hulyo 18.

Nakab-ot han unyon an ₱70 nga umento ha suhol kada tuig para ha masunod nga tulo katuig, dugang nga ₱0.50 ha seniority pay, ₱20,000 nga signing bonus, ₱7,500 nga lump sum, ₱80 meal allowance nga may dugang nga ₱35 kun obertaym, ngan dugang nga “leave credits” para ha mga trabahador nga masobra 15 katuig na ha pabrika.

Nahiduso liwat han unyon an maneydsment nga ihatag ha mga trabahador an dugang nga suhol (retroactive) para ha mga bulan han Oktubre 2024 tubtub Hunyo yana nga tuig.

Samtang, igin-anunsyo hadton Agosto 13 han University Hotel Worker’s Union-KMU NCR nga napirmahan liwat an bag-o nga CBA giutan hini ngan han maneydsment han hotel ha sakob han University of the Phillipines-Diliman ha Quezon City.

Pira ha nakab-ot pa ha CBA an dugang nga benepisyo ngan alawans nga makakabulig ha matag-adlaw nga panginahanglan han trabahador.