Ig-undong an IHL, papagbatunon hi Marcos. Gatus-gatos an nagmartsa ngadto ha Mendiola ha Manila hadton Agosto 19 agud handumon an ika-76 nga anibersaryo han International Humanitarian Law (IHL) ngan papagbatunon an rehimen US-Marcos ha seryoso nga pagtalapas hini ha nasering nga mga pagsurundon. Ginkundenar nira an National Action Plan for Unity, Peace and Development (NAP-UPD) han rehimen nga gintawag nira nga “nasyunal nga plano para ha terorismo han estado.”

Hadton Agosto 13, ginsulong han mga progresibo nga grupo an Asia-Pacific Regional Conference on IHL nga hadto ginhihimo ha Makati City. Ginkundenar nira an pangunguna ha kumperensya han rehimen Marcos nga gintawag nira nga numero uno nga parupanalapas han IHL ha nasud. Usa kaadlaw antes hini, nagtirok an mga estudyante ha UP Diliman agud handumon an Araw ng IHL ngan ibuksas an seryoso nga pagtalapas han rehimen Marcos dinhi, kalakip an ha mga nasyunal nga minoriya nga katawhan.

Baliskaron an desisyon. Kinadto an mga progresibo nga organisasyon ha Korte Suprema hadton Agosto 12 agud ig-insister nga baliskaron hini an desisyon nga nagbasura ha impeachment complaint kontra kan Sara Duterte nga iginpadangat han Kongreso ha Senado.

Pakigbisog ha demolisyon ha Smokey Mountain. Nagprotesta ha atubangan han Manila City Hall an mga residente han Smokey Mountain hadton Agosto 18 agud ig-insister ha meyor han syudad nga hi Isko Moreno nga makigdayalogo ha ira tungod ha mga hulga han pagpapaiwas ha ira komunidad. Iginhihimo an demolisyon para ha 100 megawatt nga Waste-to-Energy (WTE) Incineration Plant nga igtitindog ha lugar.