Dua nga unyon ti balligi a nagipinal ti collective bargaining agreement (CBA) da idi Hulyo ken Agosto.

Inyanunsyo ti Unyon ng mga Panadero sa Gardenia Bakeries Philippines Inc. (UPGBPI-OLALIA-KMU) ti balligi iti pannakinegosasyon da para iti baro a CBA idi Hulyo 18.

Nagun-od ti unyon ti ₱70 nayon a sweldo kada tawen para iti sumaruno a tallo a tawen, nayon a ₱0.50 iti seniority pay, ₱20,000 signing bonus, ₱7,500 a lump sum, ₱80 meal allowance nga adda nayon na a ₱35 nu obertaym, ken nayon a “leave credits” para kadagiti mangmangged a nasurok 15 tawenen iti pabrika.

Naiduron met ti unyon ti maneydsment nga ited kadagiti mangmangged ti nayon a sweldo (retroactive) para kadagiti bulan ti Oktubre 2024 agingga Hunyo tatta a tawen.

Kabayatanna, inyanunsyo ti University Hotel Worker’s Union-KMU-NCR idi Agosto 13 a napirmaan met ti baro a CBA iti baet da iti maneydsment ti hotel iti uneg ti University of the Phillipines-Diliman idiay Quezon City.

Sumagmamano pay kadagiti naipagballigi iti CBA ti nayon a benepisyo ken alawans a makatulong iti inaldaw a kasapulan ti mangmangged.