Itandudo ti IHL, pagsungbaten ni Marcos. Ginasut ti nagmartsa agturong iti Mendiola idiay Manila idi Agosto 19 tapno lagipen ti maika-76 anibersaryo ti International Humanitarian Law (IHL) ken pagsungbaten ti rehimen US-Marcos iti seryoso a panaglabsing daytoy kadagiti nasao a pagannurotan. Kinundenar da met ti National Action Plan for Unity, Peace and Development (NAP-UPD) ti rehimen nga inawagan da a “nailyan a plano para iti terorismo ti estado.”

Idi Agosto 13, dinarup dagiti progresibo a grupo ti Asia-Pacific Regional Conference on IHL nga idi ket maang-angay idiay Makati City. Kinundenar da ti panangiyuna ti rehimen Marcos iti kumperensya nga inawagan da a numero uno a manglablabsing iti IHL iti pagilyan. Maysa nga aldaw sakbay daytoy, nagtitipon dagiti estudyante iti UP Diliman tapno lagipen ti Aldaw ti IHL ken ibunannag ti seryoso a panaglabsing ti rehimen Marcos ditoy, kabilang kadagiti katutubo nga umili.

Baliktaden ti desisyon. Nagturong dagiti progresibo nga organisasyon iti Korte Suprema idi Agosto 12 tapno irupir a baliktaden daytoy ti desisyon a nangibasura iti impeachment complaint laban ken Sara Duterte nga inpasa ti Kongreso iti Senado.

Laban iti demolisyon iti Smokey Mountain. Nagprotesta iti sango ti Manila City Hall dagiti residente ti Smokey Mountain idi Agosto 18 tapno ipaganetget iti mayor ti syudad a ni Isko Moreno a makidayalogo kadakwada gapu iti pangta ti panangpatalaw kadakwada iti komunidad da. Maiyar-aramid ti demolisyon para iti 100 megawatt a Waste-to-Energy (WTE) Incineration Plant a maitakder iti lugar.