Liboan ka kabatan-onan ug katawhan ang midagsang sa kalsada sa milabayng duha ka semana aron malukpanong kundenahon ang walag too nga korapsyon ilalum sa rehimeng Marcos. Gipanawagan nila ang pagpanubag ug pagpriso sa tanang mga nalambigit sa kahiwian ilabina sa mga proyektong flood control.

Nahimong tataw ang protesta sa gatusan ka libo sa Luneta Park sa Maynila niadtong Setyembre 21 sa pagpanguna sa mga grupo sa kabatan-onan, alyansang TAMA NA (Taumbayan Ayaw sa Magnanakaw at Abusado Network Alliance), ug sa Bagong Alyansang Makabayan. Gibaha sa mga tawo ang Luneta aron iduso nga “TAMA NA! Itigil ang kurakot! Lahat ng sangkot, dapat managot!” (HUSTO NA! Ihunong ang kurapkot! Tanang lambigit, angay manubag!)

Misalmot sa protesta ang mga mamumuo, mag-uuma, kabus-sa-kasyudaran, tawong-simbahan, kababayen-an, magtutudlo, propesyunal ug uban pang sektor.

Grupu-grupong mitambong ang mga siklista, rapper, rider, drag queen ug uban pang grupo nga unang mosalmot sa usa ka protesta. Namulong sa programa ang mga representante sa progresibong partido, lider-masa, pari, ug mga biktima sa baha ug kalamidad.

“Ginapamatud-an [sa mga nabutyag nga kahiwian] ang kadaut sa burukrata-kapitalismo diin ginagamit sa mga pulitiko ang ilang pusisyon ug impluwensya… aron padak-on ang ilang bahandi ug gahum,” pamahayag sa Bagong Alyansang Makabayan.

Gitudlo nila si Ferdinand Marcos Jr isip prinsipal nga may tulubagon sa linuog nga korapsyon sa mga proyektong flood control. Gimakmak sa grupo ang pagpakaaron-ingnon ni Marcos nga walay kasayuran sa korapsyon bisan og siya ang misugyot, mipirma ug mipatuman sa nasudnong badyet. Modagsang sa Mendiola ang Bayan para singilon si Marcos.

Dungan niini, angayan usab kunong panubagon si Sara Duterte ug Rodrigo Duterte sa pag-usik-usik sa confidential and intelligence funds, sa Pharmally scam, ug uban pang korapsyon. Lakip sila sa sistematikong korapsyon sa nasud.

Gawas sa Luneta ug Mendiola, gihimo usab ang protesta sa EDSA People Power Monument sa Metro Manila.

Sa uban pang bahin sa nasud, gilunsad ang mga demonstrasyon ug aktibidad sa Ilocos Norte, La Union, Pangasinan, Benguet, Cagayan, Isabela, Pampanga, Bulacan, Oriental ug Occidental Mindoro, Camarines Sur, Catanduanes, Albay, Sorsogon, Negros Occidental ug Oriental, Iloilo, Capiz, Antique, Aklan, Bohol, Cebu, Eastern Samar, Leyte, Misamis Oriental, Davao del Sur, ug South Cotabato.

Lapad nga kalihukang protesta

Ayha ang panagtapok sa Luneta ug EDSA, tataw na ang lapad nga partisipasyon sa mga kabatan-onan ug uban pang demokratikong sektor aron batukan ang korapsyon. Lain-laing mamugnaong porma sa protesta ang gihimo sa tibuok Pilipinas.

Lakip sa maong mga protesta ang mga walkout ug boykot sa klase sa milabayng semana sa kapin 16,000 ka mga estudyante, magtutudlo ug empleyado sa University of the Philippines sa Los Baños (7,000), Diliman (5,000), Baguio (1,800), Cebu (1,000), Manila (600), Mindanao (600), Pampanga (200), Visayas (200), ug Tacloban (120). Naglunsad usab og mga piket ug demonstrasyon sa kapin 40 ka mga pangpubliko ug pribadong unibersidad, lakip ang pinakadaku sa nasud sa Ateneo de Manila University (2,000), Saint Louis Universirty (1,000), Cavite State University (400), Bulacan State University, Tarlac State University, Bicol University, Mindoro State Unversity, Visayas State University, Mindanao State University-GenSan, Xavier University ug mga eskwelahan ilalum sa One Taft Alliance.

Halos adlaw-adlaw ang piket sa mga nasudnon ug lokal nga grupo sa Metro Manila lakip sa Quezon City, Maynila, Navotas City, Caloocan City, Muntinlupa City, Taguig City ug Marikina City. Sa tibuok nasud, sama sa Hagonoy, Bulacan, midagsang ang mga residente sa kalsada para kundenahon ang palpak nga pagtubag sa baha nga halos tibuok tuig nang wala nahubas. Nagprotesta usab ang 6,000 ka residente sa Pampanga kontra korapsyon. Nagkasa usab og pipila ka adlaw nga hunong-pasada ang mga grupo sa transportasyon. Gipadayag usab ang grabeng kasuko sa katawhan pinaagi sa pagdagdang ug paglabay og lapok ug pintal sa mga upisina sa ahensya sa gubyerno ug kontratistang nalambigit sa korapsyon.

Dili moubos sa 16 ka unyon ilalum sa Kilusang Mayo Uno ang nagprotesta matag lunch break ug ting-uli sama sa mga unyon sa Nexperia Phils, PUP Janitors, Philfoods Fresh-Baked Products, Pambato Cargo Forwarders, Daiwa Seiko Philippines Corp ug daghan pang uban. Singgit nila: Marcos, kumander-in-thief panubagon! Walag too usab ang pagkalampag ug pagbagting sa mga kampanilya sa simbahan, hiniusang pag-ampo, pag-ugbok og kandila, pagsab-it ug pagdikit og mga balatengga ug poster, paghimo og mga kanta ug rap, sayaw-protesta ug zumba, fun run ug uban pang tipo sa protesta.

Nagresulta usab ang pagkundena sa kahiwian sa kalit nga pagkatukod sa lain-laing ang-ang sa mga koordinasyon, alyansa ug kahugpungan. Tin-aw ang mensahe sa kalihukang protesta: pagpatingil ug pagpanubag.