Linaksa ka pamatan-on kag pumuluyo ang nagkadto sa kadalanan sa nagligad nga duha ka semana agud lapnagon nga kundenahon ang wala-tuo nga korapsyon sa idalum sang rehimen Marcos. Ginapanawagan nila ang pagpasabat kag pagpabilanggo sa tanan nga mga imbolbado sa korapsyon ilabina sa mga proyektong flood control.

Nangin matingkad ang hublag sang puluan ka libo sa Luneta Park sa Manila subong nga Septyembre 21 sa pagpanguna sang mga grupo sang pamatan-on, alyansa sang TAMA NA (Taumbayan Ayaw sa Magnanakaw at Abusado Network Alliance), kag sang Bagong Alyansang Makabayan. Ginbaha sang mga tawo ang Luneta para igiit nga “TAMA NA! Untaton ang kurakot! Tanan nga imbolbado, dapat manabat!”

Nagtambong sa protesta ang mga mamumugon,mangunguma, imol nga taga-syudad, tawong-simbahan, kababaehan, manunudlo, propesyunal kag iban pa nga sektor.

Grupo-grupo ang nagtambong nga mga siklista, rapper, rider, drag queen kag iban pa nga grupo nga bag-o lang nagpakigbahin sa isa ka protesta. Naghambal sa programa ang mga tiglawas sang progresibo nga partido, lider-masa, pari kag mga biktima sang baha kag kalamidad.

“Ginpamatud-an [sang mga nabuyagyag nga mga korapsyon] ang halit sang burukrata kapitalismo kon diin ginagamit sang mga pulitiko ang ila pusisyon kag impluwensya agud padakuon ang ila manggad kag gahum,” pahayag sang Bagong Alyansang Makabayan.

Gintudlo nila si Ferdinand Marcos Jr bilang prinsipal nga may salabton sa makangilidlis nga korapsyon sa mga proyektong flood control. Ginbatikos sang grupo ang tuso nga pagpakuno-kuno nga inosente si Marcos sa korapsyon nga siya mismo ang nagproponer, nagpirma kag nagpatuman sa pungsodnon nga badyet. Magakadto ang Bayan sa Mendiola agud sukton si Marcos.

Kadungan sini, dapat man kuno nga pasabton si Sara Duterte kag Rodrigo Duterte sa paggarnatsar sa confidential and intelligence funds, sa Pharmally scam, kag iban pa nga korapsyon. Kabahin sila sang sistematikong korapsyon sa pungsod.

Magluwas sa Luneta kag Mendiola, ginpatigayon man ang hublag sa EDSA People Power Monument sa Metro Manila.

Sa iban pa nga bahin sang pungsod, ginpatigayon ang mga demonstrasyon kag aktibidad sa Ilocos Norte, La Union, Pangasinan, Benguet, Cagayan, Isabela, Pampanga, Bulacan, Oriental kag Occidental Mindoro, Camarines Sur, Catanduanes, Albay, Sorsogon, Negros Occidental kag Oriental, Iloilo, Capiz, Antique, Aklan, Bohol, Cebu, Eastern Samar, Leyte, Misamis Oriental, Davao del Sur, kag South Cotabato.

Malapad nga kahublagan protesta

Antes ang pag-ululupod sa Luneta kag EDSA, nangin matingkad na ang malapad nga partisipasyon sang mga pamatan-on kag iban pa nga demokratikong sektor para batikuson ang korapsyon. Lain-lain nga matinugahon nga porma ang ginpatigayon sa bug-os nga Pilipinas.

Lakip sa nga hublag nga ini ang walkout kag boykot sa klase sa nagligad nga semana sang masobra 16,000 ka mga estudyante, manunudlo kag empleyado sang University of the Philippines sa Los Baños (7,000), Diliman (5,000), Baguio (1,800), Cebu (1,000), Manila (600), Mindanao (600), Pampanga (200), Visayas (200), kag Tacloban (120). Nagpatigayon man sang mga piket kag demonstrasyon sa masobra 40 ka mga pangpubliko kag pribado nga unibersidad, lakip ang mga pinakadalagko sa pungsod nga Ateneo de Manila University (2,000), Saint Louis Universirty (1,000), Cavite State University (400), Bulacan State University, Tarlac State University, Bicol University, Mindoro State Unversity, Visayas State University, Mindanao State University-GenSan, Xavier University kag mga eskwelahan sa idalum sang One Taft Alliance.

Halos adlaw-adlaw ang piket sang mga pungsodnon kag lokal nga grupo sa Metro Manila lakip sa Quezon City, Manila, Navotas City, Caloocan City, Muntinlupa City, Taguig City kag Marikina City. Sa bug-os nga pungsod, kaangay sa Hagonoy, Bulacan, nagdagsa ang mga residente sa kadalanan para kundenahon ang palpak nga pagsabat sa baha nga halos bug-os nga tuig na nga wala nagatahaw. Naghulag man ang 6,000 ka residente sang Pampanga kontra korapsyon. Nagkasa man sang pila ka adlaw nga untat-byahe ang mga grupo sa transportasyon. Ginhatagan laragway man ang grabe nga kaakig sang pumuluyo sa pagsulong kag pagbato sang lutak kag pintura sa mga opisina sang ahensya sang gobyerno kag kontratista nga imbolbado sa korapsyon.

Indi magnubo sa 16 ka unyon sa idalum sang Kilusang Mayo Uno, ang naglunsar sang protesta kada lunch break kag pagpauli ang mga unyon sa Nexperia Phils, PUP Janitors, Philfoods Fresh-Baked Products, Pambato Cargo Forwarders, Daiwa Seiko Philippines Corp kag madamo pa nga iban. Singgit nila: Marcos, kumander-in-thief pasabton! Wala-tuo man ang pagpagahod kag pagbagting sang mga lingganay sang simbahan, ululupod nga pagpangamuyo, pagsindi sang kandila, pagsab-it kag pagpangtapik sang mga balatengga kag poster, paghimo sang kanta kag rap, saot-protesta kag zumba, fun run kag iban pa nga tipo sang aksyon.

Naghorma man ang pagkundena sa korapsyon sa kalit nga pagtukod sang lain-lain nga mga lebel sang mga relasyon, alyansa kag asosasyon. Maathag ang mensahe sang kahublagan protesta: pagpanukot kag pasabton.