Niining milabayng mga bulan, nabutyag ang linuog nga mga kaso sa human trafficking sa mga Pilipino nga gisulod sa mga “scam hub” sa Cambodia, Thailand, Laos ug Myanmar. Matud sa datos sa estado, dili moubos sa 695 ka biktimang Pilipino ang nakaluwas sa maong mga nasud karong tuiga.

Ang scam hub trafficking usa ka tipo sa trafficking o iligal nga rekrutment alang sa pagpahimulos, diin ang mga biktimang nalingla sa tanyag nga pekeng trabaho gisulod sa mga scam hub o scam farm isip online scammer alang sa mga sindikato. Bisan dili tanang biktima ang na-traffick, tanang mamumuo sa scam hub gigamitan og kabangis ug pagpangabuso aron pugson silang himuon ang iligal nga aktibidad.

Ang sagad nga ginapahimo sa mga biktima mao ang “romance scam” diin ilang agnihon nga mahiguma kanila ang mga target, nga sa madugay, ginaagni nga magpadala og kwarta sa pekeng negosyo, cryptocurrency ug uban pang mini nga pamuhunan. Target sa ilang operasyon ang mga tawo sa mga nasud sa Asia, North ug South America, ug Middle East. Ang mga scam hub ginadumalahan sa mga langyawng sindikatong kriminal, kakunsaba ang mga lokal nga upisyal sa gubyerno.

Unang nataho ang ingon niining porma sa trafficking niadtong 2015. Apan nagsugod kining mikaylap ug sistematiko niadtong 2021. Gigamit sa mga sindikato ang mga abandonadong kasino ug hotel aron himuong scam hub. Mayorya sa mga scam hub nagsugod sa Southeast Asia apan milapad kini hangtud sa West Africa, Middle East ug Central America. Target sa mga sindikato ang mga mamumuo nga adunay kahibalo sa information technology ug hanas sa pinulungang English.

Nahimong lugar usab sa scam hub ang Pilipinas, nga nagpaluyo sa mga Philippine Offshore Gaming Operation o POGO nga gitukod sa nasud. Daghan sa mga giulipon dinhi mga Chinese nga iligal nga gipasulod sa nasud ug mga Pilipino nga ginapatrabaho isip scammer sa maong mga pasilidad.

Ang linuog nga kasinatian sa mga biktima

Mayorya sa mga Pilipinong biktima naawhag nga magtrabaho isip customer service representative sa Cambodia ug Myanmar nga adunay sweldong US$700 kada bulan. Apan pag-abot nila didto, gikumpiska ang ilang pasaporte ug selpon. Gisulod sila sa scam hub, nga ang target mga Pilipino sa US.

Ulipon ug produkto ang trato sa mga Pilipinong migrante. Kung dili nila himuon ang ilang trabaho o maabot ang kota, ginapasakitan sila, ginapriso nga walay pagkaon ug ginapaulawan sa ilang mga amo. Labing bangis nilang nasinati mao ang tortyur ug pagkuryente. Ang ubang mamumuo ginabaligya sa ubang kumpanya sa higayong dili na sila “mapuslan” sa ilang amo.

Bisan og nakaluwas sa mga scam hub, daghan sa mga biktimang Pilipino ang nakasinati pa gihapon og grabeng troma ug problema sa panglawas tungod sa naagiang kamangtas.

Sa kasamtangan, adunay 148 ka Pilipinong migrante ang nakatakdang ireskyu ug iuli sa Pilipinas gikan sa lain-laing scam hub sa Asia.

Taliwala niini, padayon nga desperado ug nalingla ang mga Pilipino sa tanyag nga pekeng trabaho sa ubang nasud tungod sa grabeng krisis sa ekonomiya ug kawalay trabaho sa nasud.

Ang grabe, imbes nga maghatag og malahutayong trabaho nga may sustinableng sweldo, ang Department of Migrant Workers pa mismo ang nasilbing “trafficker” sa estado. Ginabaligya niini ang barating kusog-pamuo sa mga Pilipino sa ubang nasud bugti sa binilyong dolyar nga remitans samtang ginabulag ang mga pamilya ug gitangtangan og dignidad ang mga migrante. Gusto pa niini karong gamiton ang mga lokal nga gubyerno isip “rekruter” sa mga nasud ug langyawng kumpanya taliwala sa daghang mga estorya sa pagpahimulos ug abusong nasinatian sa mga migranteng Pilipino.

Hangtud dili maresolba ang kalisud ug mabasura ang labor export program nga nagtukmod sa pugos nga migrasyon, siguradong modaghan pa ang mga biktima nga yatakan ug abusuhon sa mga sindikato, ug magpahimulos sa desperasyon sa mga migrante, nga walay laing laraw kundili mahatagan og mas maayong kinabuhi ang ilang pamilya.