Reprep nga agtutubo ken umili ti nagturong iti kalsada iti naglabas a dua lawas tapno nasaknap a kondenaren ti agsasanggala a korapsyon iti uneg tii rehimen a Marcos. Impanawagan da ti panangsingir ken panangibalud kadagiti amin a karaman iti kinakunniber nangruna kadagiti proyekto a flood control.

Naisangsangayan ti panagtignay ti pinullo a ribu iti Luneta Park iti Manila kadaytoy nga aldaw ti Setyembre 21 iti panangiyuna dagiti grupo ti kabataan, alyansa a TAMA NA (Taumbayan Ayaw sa Magnanakaw at Abusado Network Alliance), ken ti Bagong Alyansang Makabayan. Linayus dagiti tao ti Luneta tapno irupir a “TAMA NA! Isardeng ti kurakot! Amin a karaman, addaan sungsungbatan!”

Dimmar-ay iti protesta dagiti mangmangged, mannalon, nakurapay iti syudad, tao ti simbaan, kababaihan, mannursuro, propesyunal ken dadduma pay a sektor.

Na-bunggoy a dimmar-ay dagiti siklista, rapper, rider, drag queen ken dadduma pay a grupo kalpasan ti idadar-ay iti maysa protesta.

Nagdiskurso iti programa dagiti mangibagbagi ti progresibo a partido, lider masa, padi, ken dagiti biktima ti layus ken didigra.

“Pinaneknekan [dagiti naibutaktak a katiwalian] ti saplit ti burukrata kapitalismo nu sadinno’t pangus-usaran dagiti pulitiko ti pusisyon ken impluwensya da…tapnu mapadakkel da ti kinabaknang ken bileg,” paduyakyak ti Bagong Alyansang Makabayan.

Intudo da ni Ferdinand Marcos Jr kas kangrunaan nga addaan sungsungbatan iti nakaam ames a korapsyon kadagiti proyekto a flood control. Binatikos ti grupo ti natuso a panaginkukuna ni Marcos iti korapsyon idinto nga isuna ti nangidasar, nangpirma ken nangipatungpal iti pangkabuklan a badyet. Agturong ti umili iti Mendiola tapno singiren ni Marcos.

Kagiddan daytoy, rumbeng kano met laeng a singiren ni Sara Duterte ken Rodrigo Duterte iti panagbusbos iti confidential and intelligence funds, iti Pharmally scam, ken dadduma pay a korapsyon. Karaman da iti sistematiko a korapsyon iti pagilian.

Laksid iti Luneta ken Mendiola, naisayangkat met laeng ti panagtignay iti EDSA People Power Monument iti Metro Manila.

Iti dadduma pay a parte ti pagilian, nairussuat dagiti demonstrasyon ken aktibidad iti Ilocos Norte, La Union, Pangasinan, Benguet, Cagayan, Isabela, Pampanga, Bulacan, Oriental at Occidental Mindoro, Camarines Sur, Catanduanes, Albay, Sorsogon, Negros Occidental at Oriental, Iloilo, Capiz, Antique, Aklan, Bohol, Cebu, Eastern Samar, Leyte, Misamis Oriental, Davao del Sur, ken South Cotabato.

Nasaknap a tignayan protesta

Sakbay ti panagtitipon iti Luneta ken EDSA, nalataken ti nalawa a partisipasyon dagiti agtutubo ken dadduma pay a demokratiko a sektor tapno dillawen ti korapsyon. Nagduduma ti naparnuay a porma ti protesta ti naisayangkat iti intero a Pilipinas.

Karaman dagitoy a panagtignay dagiti walkout ken boykot iti pagadalan iti kallabes ti nasurok 16,000 nga estudyante, mannursuro ken trabahador iti University of the Philippines iti Los Baños (7,000), Diliman (5,000), Baguio (1,800), Cebu (1,000), Manila (600), Mindanao (600), Pampanga (200), Visayas (200), ken Tacloban (120). Naisayangkat met lang dagiti piket ken demonstrasyon iti nasurok 40 pampubliko ken pribado nga unibersidad, maibilang ti kadakkelan iti pagilian iti Ateneo de Manila University (2,000), Saint Louis University (1,000), Cavite State University (400), Bulacan State University, Tarlac State University, Bicol University, Mindoro State University, Visayas State University, Mindanao State University-GenSan, Xavier University ken dagiti pagadalan iti uneg ti One Taft Alliance.

Agarup inaldaw ti piket dagiti nasyunal ken lokal a grupo iti Metro Manila karaman iti Quezon City, Maynila, Navotas City, Caloocan City, Muntinlupa City, Taguig City at Marikina City. Iti sibubukel nga ili, kas iti Hagonoy, Bulacan, dimmarup dagiti residente iti kalsada tapno kundenaren ti palpak a solusyon iti layus a kayarigan na a di maatyanan. Nagtignay met laeng ti 6,000 residente ti Pampanga kontra korapsyon. Nangisayangkat met lang ti sumagmamano nga aldaw a sardeng-pasada dagiti grupo iti transportasyon. Naipasimudaag met laeng ti nakaru nga unget ti umili iti panangdarup ken panangbato ti pitak ken panangsayo ti pintura kadagiti opisina ti ahensya ti gobyerno ken kontratista a kakumplot iti korapsyon.

Iti saan a bumaba iti 16 nga unyon iti adda’t babaen ti Kilusang Mayo Uno, nangisayangkat ti protesta iti kada ti pangngaldaw ken panagaawid dagiti unyon iti Nexperia Phils, PUP Janitors, Philfoods Fresh-Baked Products, Pambato Cargo Forwarders, Daiwa Seiko Philippines Corp ken dadduma pay. Inpukkaw da: Marcos, kumander ti mannanakaw, pagbayaden! Agsisinumsumbangir met ti panagkalampag ken panagpatit dagiti kampana ti simbaan, sangkamaysa a panagkararag, panangitugkel ti kandila, panangisab-it ken panangipigket kadagiti balatengga ken poster, panagaramid kadagiti kanta ken rap, protesta-sala ken zumba, fun run ken dadduma pay a klase ti panagtignay.

Nabukel met ti panagkundenar iti kunniber iti dagus a pannakabukel iti nadumaduma a tukad dagiti relasyon, alyansa ken panagkakadua. Nalawag ti mensahe ti tignayan protesta: panagsingir ken panangpasungbat!