Nataho sa milabayng mga semana ang pipila ka nakab-ot nga kadaugan ug nagpadayong pagbatok sa mga residente sa mga magun-ubong mina ug dredging sa Ilocos Sur, Kalinga, Nueva Vizcaya, Mindoro ug Sorsogon.

Sa Ilocos Sur, natukmod sa hiniusang protesta sa katawhan ang lokal nga gubyerno nga motingog ug magpadayag sa pagpahunong sa operasyon sa magun-ubong operasyong dredging sa Isla Verde Mining and Development Company sa bukana sa Lower Abra River sa langkub sa prubinsya. Niadtong Setyembre 2, nagpadayag ang lokal nga gubyerno nga ipahunong ang operasyon tungod sa hiniusa ug padayon nga protesta sa mga komunidad.

Sa Kalinga, napabasura sa mga lumad ang gipagula nga mini nga Free, Prior and Informed Consent alang sa Saltan Dam nga proyekto sa kumpanyang Australian nga JBD Water Power Inc. Nasayran kini sa mga residente niadtong Setyembre 15 dungan sa pagpasang-at nila og mga petisyon sa National Commission for Indigenous Peoples aron ipabasura ang FPIC alang sa Saltan Dam ug Upper Tabuk Hydropower Project (UTHP). Gipahibalo usab kanila nga ang FPIC alang sa UTHP posible usab nga bawion ug ibasura.

Sa Nueva Vizcaya, nagbarikada ang mga residente sa Barangay Bitnong, Dupax del Norte sa ilang yuta gikan Setyembre 17 aron babagan ang pagsulod sa mga ekipo pangmina sa Woggle Corporation, usa ka kumpanyang nakabase sa United Kingdom. Tungod sa malukpanong pagbabag sa katawhan sa planong eksplorasyon, temporaryong giundang sa kumpanya ang ilang operasyon.

Sa Oriental Mindoro, gilunsad ang usa ka prayer rally niadtong Setyembre 6 sa merkado sa lungsod sa Gloria aron babagan ang dredging sa isla. Misalmot sa protesta ang lain-laing kahugpungan, organisasyon, simbahan, mga pulitiko, ug residente gikan Calapan City hangtud Bansud. Matud nila, labing makadaut sa baybay ug hulga sa panginabuhian sa mga mangingisda ang dredging.

Sa Sorsogon, napasuspinde sa mga residente niadtong Setyembre 10 ang permit sa Siating Construction and Development Corporation alang sa pagkwari og bato ug balas sa Barangay San Roque sa lungsod sa Bulusan. Gibase sa gubernador ang desisyon sa gisumiteng position paper sa San Roque Ecological Initiative sa Barangay San Roque. Matud sa mga residente, iligal ang kwari tungod kay kini walay pangpublikong konsultasyon. Duul usab kini sa Bulusan Volcano Natural Park (BVNP), nga usa ka protected area.