Padayon ang pagbaha sa mga protesta sa tibuok nasud batok sa sistema sa korapsyon sa estado. Salamin kini sa nag-awas-awas nga kasuko sa lapad nga masa sa katawhang Pilipino batok sa higanteng burukrata-kapitalistang pagpangawkaw sa rehimeng Marcos.

Sa desperasyong panalipdan ang kaugalingon gikan sa kasuko sa katawhan, pugos nga nagpapogi si Marcos aron tuison ang iyang dautang dungog isip simbolo sa kahiwian. Samtang ginapig-ot ang pipila ka pulitikong karibal ug bisan ang mga alyadong wala nagsentro og kikbak, nanghunaw si Marcos sa iyang papel sa lapad nga korapsyon.

Gitukod ni Marcos ang usa ka walay kapadulngang “independyenteng komisyon” nga mag-imbestiga kuno sa hiwi nga proyektong flood control. Taktika lamang ang maong imbestigasyon nga gimando ni Marcos Jr aron linglahon ang katawhan ug ilayo kaniya ang atensyon.

Tinuod nga si Marcos ang utok sa korapsyon luyo sa hiwi nga proyekto sa flood control nga gibubuan niya og kapin ₱1 trilyon sukad makalingkod sa poder niadtong 2022. Sama sa tanan niyang gisundan, mikawkaw si Marcos og binilyong piso gikan sa kikbak sa multibilyong mga kontrata sa gubyerno, lakip ang mga kalsada, tulay, riles, ug uban pang dagkung proyekto sa konstruksyon, bisan sa ismagling, kontrata sa depensa, kontrata sa pagpaabang sa yuta, ug sa daghan pang paagi sa pagkawat sa kwarta sa katawhan.

Nagpaharuhay ug nagpakatagbaw sa luho ang nag-unang burukrata-kapitalistang si Marcos. Nabantog ang hilig niya sa multimilyong pisong eksklusibong mga konsyerto ug engrandeng salu-salo sama sa gihimo kanhi sa iyang adlawng natawhan. Hilabihan siyang gimakmak sa paglupad sa Singapore aron lang motan-aw og lumba sa mga kotse. Gigamit niya ug sa iyang asawa ang pondo sa katawhan aron himuong personal nga bakasyunan ang Malacañang alang sa kapritso sa ilang pamilya.

Dayag ang pagkabakakon ni Marcos sa pagpakaaron-ingnong dapig siya sa katawhan nga nakasuko sa korapsyon, ug nagsulting kung dili siya presidente siya mismo mokuyog sa mga protesta. Ang tinuod, gunit ni Marcos ang mapanumpuong gahum sa pasistang estado nga ginagamit niya aron sampongan ang tingog ug sumpuon ang tanang porma sa pagsukol sa katawhan.

Buhi ang kabilin sa 14-ka-tuig sa pasistang diktadurya ug paglimas sa bahandi sa katawhan sa iyang amahan nga si Marcos Sr. Gitiktikan, gihasi ug gitarget sa bangis nga atake sa mga ahente sa estado ang mga organisador ug myembro sa mga unyon sa mamumuo, mga kahugpungan sa komunidad, mga organisasyon sa estudyante, lakip ang mga tigpanalipud sa tawhanong katungod. Gatusan pa gihapon ka bilanggong pulitikal ang napriso. Walay hunong ang mga paglapas sa tawhanong katungod ug internasyunal nga makitawhanong balaod sa pagpahamtang ni Marcos og balaod militar sa liboan ka barangay sa kabanikanhan aron sumpuon ang pagpanalipud sa katawhan sa ilang yuta ug panginabuhian batok sa pagsulod o pagpalapad sa mga plantasyon ug operasyon sa mina.

Si Marcos, pangulo sa burukrata-kapitalistang estado, ang hari sa korapsyon. Siya ang pasistang pangulo nga may puthaw nga kamot aron pulbuson ang tanang nagababag ug nagasukol. Siya ang presidenteng “Itoy sa Kano” ug suluguong nagsilbi sa estratehikong mga interes imperyalistang US sa ekonomiya, pinansya, ug militar.

Biktima ang mga Pilipino sa lapad ug sistemikong korapsyon ug pasismo. Nag-antus sila sa nagkadunot nga katilingbanong serbisyo, pagtaas sa galastuhon para mabuhi, ubos nga suhulan, kaylap nga kawalay trabaho ug panginabuhian, ug paggrabe sa sosyo-ekonomikong kahimtang. Mibarog ug nagprotesta sila aron hukman si Marcos ug panubagon ang mga korap.

Kinahanglang palig-onon sa mga Pilipino ang ilang panaghiusa, tukuron ang ilang mga organisasyon, ug palapdon ug pakusgon ang ilang mga protesta sa umalabot nga mga bulan. Kinahanglan nilang ibutyag ug isalikway ang pipila ka pwersang nagasakay sa protestang anti-korapsyon nga nagaprotekta kang Marcos bugti sa pabor ug pusisyon. Nagsilbi sila sa mga pakana ni Marcos nga pakalmahon ang protesta. Apan pakyas sila tungod kay ang mga haw-ang ug walay pulos nga pagpakaaron-ingnon ni Marcos labaw lamang nga mipaypay sa kalihukang protesta. Mikusog ang singgit alang sa pagpaluwat o pagpalagpot kang Marcos ug sa tanang korap sa estado.

Samtang ginapalapad, ang mga protesta batok kang Marcos ug sa malukpanong korapsyon kinahanglang ipataas ug ilambigit sa katawhang Pilipino sa pangkinatibuk-ang pakigbisog aron tapuson ang madaugdaugon ug mapahimuslanong sistemang semikolonyal ug semipyudal. Ang maong sistema anaa ubos sa maki-hut-ong nga kontrol sa dagkung burgesya-kumprador, mga burukrata-kapitalista, ug dakung agalong yutaan.

Kini nga mga hut-ong sa Pilipinas gihimugso sa imperyalismong US ug nagakontrol sa neokolonyal nga estado. Silang tanan gapanubag, gasunud-sunod ug nakigkunsaba sa imperyalismong US sa pagkawkaw sa bahandi sa nasud ug sa pasistang pagpanumpo sa lapad nga masa sa katawhan. Sa partikular, gamit sa mga burukrata-kapitalista ang gahum sa estado aron kawaton ang kwarta sa katawhan ug magpadato sa tanang porma sa korapsyon.

Sa katapusan, ang pakigbisog batok sa korapsyon ug tanang porma sa pagpangdaugdaug sa katawhang Pilipino labaw pa sa pagtangtang kang Marcos o bisan sa pagpahagba sa tibuok gubyerno. Malangkat lamang ang ugat sa sistemikong korapsyon pinaagi sa demokratikong rebolusyon sa katawhan aron tapuson ang tulo ka dangan nga burukrata-kapitalismo, imperyalismo ug pyudalismo. Ginaasdang kini sa Partido Komunista ng Pilipinas, pinaagi sa Bagong Hukbong Bayan isip nag-unang armas aron bungkagon ang armadong kusog sa reaksyunaryo ug neokolonyal nga estado.

Ginaawhang sa Partido ang katawhang Pilipino nga dugang pakusgon ang ilang mga rebolusyonaryong organisasyon, palapdon ang han-ay sa National Democratic Front, ug mosuporta ug mosalmot sa Bagong Hukbong Bayan.

Nanawagan ang Partido sa kabatan-onan nga moadto sa lapad nga kabanikanhan kung asa padayon nga gipalambo sa rebolusyonaryong kalihukan ang mga organo sa pulitikanhong gahum. Ginatukod kini sa batakang mga rebolusyonaryong organisasyong masa sa mag-uuma, kabatan-onan, kababayen-an ug uban pang demokratikong sektor, kaabag ang hukbong bayan. Nagsilbi kining binhi sa demokratikong gubyerno sa katawhan nga mopuli sa dunot ug papet nga gubyerno sa higayong makab-ot ang rebolusyonaryong kadaugan sa armadong pakigbisog alang sa nasudnong kagawasan ug katilingbanong hustisya.